Іshkindik, aıdandy, qarymjy: Asyǵys aýdarylǵan termınderdiń maǵynasyn bilesiz be

NUR-SULTAN. QazAqparat - Professor Sherýbaı Qurmanbaıuly termınderdi aýdarǵanda asyǵystyqqa jol bermeýge shaqyrdy, dep xabarlaıdy QazAqparat tilshisi.

«Termın máselesinde san qýmaý kerek. Mysaly, myna termınderdi san qýǵandyqtan bekittik. Mynany qarańyzdar, «ishkindik» - «gıpotsentr», «maıturaqtylyq» - «maslostoıkost», «tútintartqy» - «dymosos», «aıdandy» - «destılıant», «qarymjy» - «zadatok», al «sáýlequraý» - «fotosıntez», - dedi Sh.Qurmanbaıuly QR Parlament Májilisinde ótken ǵylymı-praktıkalyq konferentsııada.

Ǵalymnyń aıtýynsha, termın aýdarý - bul shyǵarmashylyq jumys. Al shyǵarmashylyqta asyǵystyq bolmaýy kerek.

«Qazir ındıkator bar. Oǵan sáıkes, ótken jyly 21 myń termın bekitildi. Bıyl taǵy 24 myń termın, al kelesi jyly 27 myń termın bekitilýi kerek. Biraq bul - shyǵarmashylyq protsess. Máselen, aqynǵa bir aıda 500 jol óleń, bir jylda 6 myń óleń jazý kerek dep tapsyrma bere almaımyz ǵoı. Aqynǵa japyraqtyń sybdyry, sýdyń syldyry áser etken kezde óleń jazylady. Al ákimshilik jolmen óleń jazdyrtsaq, ol óleń bolmaıdy. Sondyqtan termındi shyǵarmashylyqpen jasaý qajet», - dep atap kórsetti Sh.Qurmanbaıuly.

Aıta keteıik, búgingi jıynda professor Sherýbaı Qurmanbaıuly termınologııanyń ózekti máselelerin atap ótti. Osy oraıda ǵalym termınkomnyń quziretin kúsheıtý kerek dep sanaıdy. Budan bólek, termınderdi tańdaǵanda basshylyqtyń bedeli basym bolyp ketedi. Al Axmet Baıtursynov atyndaǵy Til bilimi ınstıtýtynyń dırektory, professor Erden Qajybek termınologııa sózdikterin shyǵarý josparlary týraly aıtty.