Іshki naryq otandyq munaı ónimderimen tolyq qamtamasyz etilgen

NUR-SULTAN. QazAqparat – Jol salý kóleminiń ósýine baılanysty bıtým óndirisi ulǵaıtyldy. Bul týraly QR Energetıka mınıstrliginiń alqa májilisinde vedomstvo basshysy Nurlan Noǵaev málim etti, dep habarlaıdy QazAqparat tilshisi.

«2020 jyldyń qorytyndysy boıynsha munaı ónimderin (avıakerosın, dızel otyny, mazýt, benzın) óndirý kólemi 11,5 mln tonnany qurady.

Bul jaǵdaı karantındik sharalardyń engizilýine oraı ishki naryqta munaı ónimderine degen suranystyń tómendeýine baılanysty týyndap otyr. Máselen, mınıstrlik ishki naryqtaǵy taýarlardyń kidirisin boldyrmaý maqsatynda munaı óńdeý zaýyttaryndaǵy munaı óńdeý josparyn 17 mln-nan 15,5 mln tonnaǵa deıin túzetti, sondaı-aq dızel otyny men áýe kerosınin óndirý deńgeıin tómendetti. Bul rette jol salý kóleminiń ósýine baılanysty bıtým óndirisi ulǵaıtyldy», - dedi mınıstr.

Sonymen qatar mınıstrlik salany qoldaý maqsatynda mynadaı birqatar sharalar qabyldady:

- Qazaqstan Respýblıkasynan jáne Keden odaǵy elderinen tys jerlerge avtomobıl kóligimen munaı ónimderin áketýge salynǵan tyıym alyp tastaldy;

- aktsızdeletin taýar óndirýshiler eksportqa satylatyn benzın jáne dızel otyny boıynsha aktsızderdi tóleýden bosatyldy;

- temirjol, avtokólik jáne qubyr joldary arqyly Qazaqstan Respýblıkasynyń aýmaǵyna benzın, dızel jáne áýe otynyn ákelýge tyıym salyndy;

- munaı ónimderine, onyń ishinde benzınge, dızel otynyna jáne mazýtqa kedendik áketý bajdarynyń mólsherlemeleri nólge teńestirildi.

«2019 jylǵy shilde aıynan bastap tyıym alynǵan soń benzındi Eýropa jáne Ortalyq Azııa elderine eksporttaý bastaldy. 2020 jyly benzın boıynsha eksport kólemi shamamen 500 myń tonnany, al dızel otyny boıynsha 180 myń tonnany qurady. Qazirgi ýaqytta ishki naryq otandyq munaı ónimderimen tolyq qamtamasyz etilgen», - dedi N. Noǵaev.