Іshki kóshi-qon: Ýaqytsha tirkelgender sany 75 myńnan 1 mıllıonǵa jetti
«2017 jylǵy qańtarda kúshine engen zańnamalyq ózgertýler ishki kóshi-qondy baqylaýdy kúsheıtýge jol ashty. Bul tirkeý esebin retke keltirý arqyly júzege asýda. Azamattar ózderiniń turatyn jerine 10 kúnniń ishinde tirkelýi kerek. Turaqty jáne ýaqytsha tirkeýden de bas tartqan adamdarǵa qatysty sanksıalar kúsheıtildi. Buryn aıyppul sanksıasy úsh aı tirkeýge turmaǵany úshin salynatyn, al qazir bir aıǵa deıin qysqartyldy», - dedi mınıstr. Osy oraıda ol ýaqytsha turatyn jerge tirkelý máselesi rettelgenin eske salyp ótti. «Osy zańnamaǵa sáıkes, turǵyn úı ıelerine de jaýaptylyq júktelgen. Óz úılerinde turyp jatqan azamattardy tirkemegeni úshin olarǵa aıyppul salynady. Bul salany retke keltirý barysynda bir jaǵymsyz máseleni baıqadyq. Sebebi turǵyndardyń kóbi ýaqytsha tirkeýdi aıtpaǵanda, turaqty turatyn jeri boıynsha da tirkelmegeni anyqtaldy. Mysaly, 2016 jyly turaqty mekenjaı boıynsha 1 mln 300 myń adam tirkelgen bolsa, al ótken jyly bul kórsetkish 2 mıllıonǵa jetti. Ýaqytsha tirkeýge turǵandardyń sany 14 esege ósti. Osylaısha, 75 myńnan 1 mıllıon adamǵa jetti. Nátıjesinde, halyqtyń ornalasýy turǵysynda shynaıy jaǵdaı anyqtaldy, bul qala men aýdannyń damýy úshin óte mańyzdy», - dedi Qalmuhanbet Qasymov. Sonymen qatar, mınıstr zańsyz mıgrasıaǵa qarsy kúres Astana, Almaty jáne basqa da úlken qalalarda bir mańyzdy máseleni sheshýge jol ashqanyn qadap aıtty. «Bul bir páterge kóptegen adamdy tirkeý máselesi. Biz jyl saıyn bir úıge keminde ondaǵan mıgranttyń jalǵan tirkelýin anyqtap, shara qabyldaımyz. Zańnamanyń kúsheýi sońǵy ýaqytta mundaı faktilerdi azaıtýǵa kómektesti. Sondaı-aq, tirkeý tártibin jeńildettik», - dedi vedomstvo basshysy.