Іshki ister organynda shenniń bar-joǵy mańyzdy bolmaýy tıis - Talǵat Qalıev

ASTANA. QazAqparat - Joldaýda aıtylǵan ishki ister organdaryn keshendi jańǵyrtý búkil júıeniń ózgerýin qamtamasyz etýi tıis. Júıeniń basty nazarynda adam, azamat, onyń qaýipsizdigi, quqyqtary men erkindikteri bolýy shart. Mundaı pikirdi saıasattanýshy, saıası ǵylymdar kandıdaty Talǵat Qalıev bildirdi, dep habarlaıdy QazAqparat.

«Nursultan Nazarbaev áleýmettik máselelerdi sezinip, kún tártibin aldyn ala jasaý sheberligin taǵy bir ret kórsetti. Qoǵamda polıtsııany reformalaý qajettigi týraly oqtyn-oqtyn pikirler aıtylyp júr. Biraq bul pikirlerdiń naqty belgilengen paradıgmasy joq. Keıbireýler vedomstvo basshylyǵyn almastyrý kerek degenmen shekteledi. Endi biri jeke quramdy qysqartý kerektigin aıtsa, bireýler pogondarynan aıyrýdy usynady. Mundaǵy basty másele, polıtsııanyń nemese onyń basshylarynyń kelbetin ózgertý emes, azamattar qaýipsizdiginiń joǵary deńgeıde bolýyna, olardyń quqyqqorǵaý organdaryna degen seniminiń artynýy qol jetkizý bolyp otyr», - deıdi T.Qalıev.

Saıasattanýshynyń atap ótýinshe, Joldaýda aıtylǵan ishki ister organdaryn keshendi jańǵyrtý búkil júıeniń ózgerýin qamtamasyz etýi tıis.

«Polıtsııa halyqqa azamattardyń qaýipsizdigin qamtamasyz etý, olardyń quqyqtary men erkindikterin qorǵaý qyzmetin kórsetetin servıstik qyzmet bolýy qajet. Qylmystardy qysqartý jáne qylmystardy ashý deńgeıin arttyrýǵa emes, azamattardyń qaýipsizdikti sezinýin qalyptastyrýǵa umtylý qajet.

Sonymen qatar qoǵamdyq qaýipsizdikti monıtorıngileý júıesinde vıdeobaqylaý kameralary jol apattaryn qysqartýdyń teńdessiz quraly, quqyqbuzýshylardy ustaýdyń tıimdi faktory, sybaılas jemqorlyqty joıý jáne adam faktorynyń aldyn alý tásili retinde kóp kómegi tıip jatyr. Qoǵamdyq qaýipsizdikti baqylaý júıesi qylmystardy ashý deńgeıin arttyrýǵa múmkindik berýmen qatar, qylmystardyń aldyn alýǵa baǵyttalǵan.

Osynyń bári quqyqqorǵaý júıesiniń jańa paradıgmasy bolyp tabylady. Onda vedomstvo basshynyń tulǵasy nemese shenniń bolýy mańyzdy emes. Júıeniń basty nazarynda adam, azamat, onyń qaýipsizdigi, quqyqtary men erkindikteri bolýy shart», - dedi ol.

Eske salaıyq, búgin Elbasy Nursultan Nazarbaev Qazaqstan halqyna jyl saıynǵy Joldaýyn jarııalady.

Onda Memleket basshysy quqyqqorǵaý salasynda ońtaılandyrý sharalaryn júrgizýdi júktedi. Atap aıtqanda, kelesi jyldan bastap quqyq qorǵaý organdarynyń jumysyn jańǵyrtý baǵdarlamasy bastalady. Sonyń aıasynda ishki ister organdarynyń shtattyq quramy ońtaılandyrylady, jalaqy artady. 

Sondaı-aq quqyqqorǵaýshylardy daıyndaıtyn joǵary oqý oryndarynyń bilim berý júıesin ózgertýdi tapsyrdy. Máselen, bilim berý merzimin 5 jyldan 3-6 aıǵa deıin qysqartý máselesi qarastyrylmaq.

Budan bólek, Qazaqstandaǵy barlyq quqyqqorǵaýshylar attestatsııadan ótkiziletin bolady.