Іshki ister organyn reformalaý: Erlan Turǵymbaev Atyraýdaǵy jumysty tekserdi

ATYRAÝ. QazAqparat – Atyraý oblysyna saparmen kelgen Іshki ister mınıstri Erlan Turǵymbaev óńirdiń tártip saqshylarymen keńes ótkizdi, dep habarlaıdy QazAqparat.

Erlan Turǵymbaev Atyraýda azamattardy táýlik boıy qabyldaıtyn 7 jańa modýldik polıtsııa beketiniń jumysyn tekserdi.

«Prezıdent Qasym-Jomart Toqaevtyń tapsyrmasyna sáıkes, biz polıtsııanyń servıstik modeline kóshýdi júzege asyrýdamyz. Onyń negizgi qaǵıdattarynyń biri - «halyqqa jaqyn polıtsııa«. Qazirgi zamanǵy modýldik beketter tıimdiligin dáleldedi. Óıtkeni, mundaı beketter ornatylǵan aýdandarda quqyqbuzýshylyqtar sany aıtarlyqtaı tómendedi. Jalpy, quqyq qorǵaý organdary turǵyndarmen tyǵyz jumys isteıtin jerde qylmysqa qarsy kúrestiń oń nátıjesin kórip otyrmyz. Azamattar ishki ister organdary júıesinde oń ózgeristerdi kórip, óz bastamalaryn da usynyp, tártip saqshylarymen yntymaqtastyqta bolýǵa múddelilik tanytyp otyr. Óıtkeni, azamattar úshin qoǵamdaǵy qaýipsizdik pen turaqtylyq qashan da zor mańyzǵa ıe» - dedi mınıstr E.Turǵymbaev.

Aldaǵy ýaqytta Atyraý oblysynda taǵy 17 zamanaýı statsıonarlyq beket ornatý josparlanýda. Olar eń krımınogendik aýdandarda jáne adamdar kóp jınalatyn oryndarda ashylady.

Sondaı-aq, ІІM basshysy jergilikti polıtsııa qyzmetiniń reformasyna nazar aýdardy.

«Bizdiń basty mindetimiz – azamattardyń qaýipsizdigi. Sondyqtan, ýchaskelik ınspektordyń qyzmet kórsetetin ákimshilik aýmaqta turaqty bolýyna jaǵdaı jasaımyz» – dedi ol.

Keńeste Atyraý oblystyq Polıtsııa departamentiniń bastyǵy Hamza Úmbetqalıev óńirde jergilikti ákimdiktiń qoldaýymen 34 jańa ýchaskelik polıtsııa beketiniń qurylysy aıaqtalǵanyn baıandady.

«Onyń 22-si ýchaskelik polıtsııa ınspektorlarynyń jumysyn yńǵaıly ári jedel etý úshin turǵyn úılermen biriktirildi» - dedi ol.

ІІM basshysy polıtsııa departamentiniń birqatar nysanyn aralap, qyzmet barysymen tanysty. Atap aıtqanda, Atyraý qalasynyń Jedel basqarý ortalyǵynyń jumysyn tekserdi. JBO mamandary 3607 beınebaqylaý kamerasyn baqylaıdy. Onyń 859-y qoǵamdyq qaýipsizdikti qamtamasyz etýge jumyldyrylǵan. Ótken jyly oblysta beınemonıtorıng júıesiniń kómegimen 286 qylmys ashylǵan.

Mınıstr ishki ister organdarynyń bólimderinde jappaı beınebaqylaý ornatýdy jedeldetýdi tapsyrdy. Soǵan oraı Atyraý oblysynyń polıtsııa nysandarynda 265 beınekamera ornatylatyn bolady.