Іshki ister mınıstrligi turǵyndardan 500-den astam atys qarýyn satyp aldy

NUR-SULTAN. QazAqparat – Qazaqstanda halyqtan zańsyz saqtalǵan qarýdy satyp alý naýqany júrip jatyr. Bul týraly QR ІІM Ákimshilik polıtsııa komıteti qarý aınalymyn baqylaý bóliminiń bastyǵy Asylbek Ydyrysov aıtyp berdi, dep habarlaıdy QazAqparat.

«Іshki ister mınıstrligi halyqtan zańsyz saqtalǵan qaý-jaraq satyp alý aktsııasyn únemi ótkizedi. 2008 jyldan bastap osyndaı 11 shara júrgizildi. 11 jylda jalpy somasy shamamen 1,8 mlrd teńgege 54 myńnan astam atys qarýy jáne 2 mln astam oıyq qarýdyń patrondary erikti túrde tapsyrylǵan. Bul sharalar krımınogendik ahýalǵa oń septigin tıgizdi», - dedi Asylbek Ydyrysov QR ІІM uıymdastyrǵan onlaın-brıfıngte.

Tek sońǵy 5 jylda qarý-jaraqpen jasalǵan qylmys sany jartysyna jýyq azaıǵan, 2016 jyly 389 qylmys bolsa, 2021 jyly 192-ge deıin tómendegen.

Zańsyz saqtalǵan qarý-jaraqty erikti túrde tapsyrýǵa nıet bildirgen azamattardyń áreketinde ózge quqyq buzýshylyq quramy bolmasa, olar qylmystyq jáne ákimshilik jaýapkershilikten bosatylady.

«Bıyl osyndaı aktsııa 25 sáýirde bastaldy. Ony ótkizýge respýblıkalyq bıýdjetten 88 mln teńge qarajat bólindi. Osy bir aptada turǵyndar 500-den astam atys qarýyn, 3,5 myńnan astam oıyq qarýynyń patrondaryn erikti túrde tapsyrdy, aldyn ala esep boıynsha 33,5 mln teńge tólenedi. Zańsyz saqtalǵan atys qarýyn, oq-dárilerdi, jarylǵysh zattardy aqshalaı syıaqy úshin tapsyrýǵa nıet bildirgen azamat kez kelgen aýmaqtyq polıtsııa organyna ótinish bere alady. Tabylǵan qarýdy bólshekteý, syndyrý jáne tasymaldaýdyń qajeti joq. Bul maqsatta bizde arnaıy oqytylǵan qyzmetkerler men tehnıkalar bar», - dedi A. Ydyrysov.