Іshki ister qyzmetkerleriniń bárin baspanamen qamtýǵa bolady - mınıstr Qasymov

ASTANA. QazAqparat - QR Іshki ister mınıstri Qalmuhanbet Qasymovtyń aıtýynsha, «7-20-25» baǵdarlamasy iske assa, ishki ister qyzmetkerlerin tolyǵymen baspanamen qamtýǵa bolady, dep habarlaıdy QazAqparat tilshisi.

«Jaqynda Memleket basshysy bes áleýmettik bastamany kóterdi. Biz onyń bárin jan-jaqty zerdelep shyqtyq. Keshe ǵana arnaıy keńes ótkizdik. Osy oraıda atalǵan bastamalardy bizdiń jeke quramymyz úshin de úlken qoldaý bolatynyn atap ótken jón. Eger turǵyn úı nesıeleri aıtylǵan sharttar boıynsha berilse, bizdiń de biraz qyzmetkerimiz baspanaly bolatyn edi. Qazirgi kezde ondaı adamdardyń sany 25 myńnan asady. Olardyń bárin baspanamen qamtıtyn bolsaq, turaqtylyq pen tártipti kúsheıte alamyz», - deıdi Q.Qasymov.

Mınıstrdiń sózine qaraǵanda, shaǵyn nesıelendirý kólemin arttyrýdyń arqasynda sottalǵan azamattardy da jumyspen kóptep qamtýǵa bolady. «Kásipkerler kóbeıse, sottalǵan azamattarǵa da jumys tabylady. Budan bólek, ortalyq aımaqtardy gazdandyrý máselesi sheshilýi tıis. Onda bizdiń qyzmetter de gazdy paıdalana alady».

Aıta keteıik, Parlament palatalarynyń birlesken otyrysynda Memleket basshysy Nursultan Nazarbaev qazaqstandyqtardy baspanamen qamtamasyz etýdiń jańa baǵdarlamasyn ázirleýdi tapsyrdy. Osyǵan baılanysty QR Ulttyq banki janynan 7 protsenttik ıpotekany beretin jańa kompanııa qurylady.