Іship alyp, boıjetkendi boqtaǵan: ShQO Mádenıet basqarmasynyń basshysy jumystan qýyldy

ÓSKEMEN. QazAqparat – Shyǵys Qazaqstan oblysy Mádenıet basqarmasynyń basshysy memlekettik qyzmettiń bedeline nuqsan keltirgeni úshin jumystan qýyldy, dep habarlaıdy QazAqparat tilshisi.

Naýryz aıynyń sońynda áleýmettik jelilerde ShQO Mádenıet basqarmasynyń basshysy Mıras Jumagulovtyń Óskemendegi karaoke-barlardyń birinde ishimdik iship alyp, boıjetkenge til tıgizgeni týraly aqparat tarap ketti. Oblystyq Polıtsııa departamenti atalǵan faktini rastaǵan bolatyn.

«30 naýryzda saǵat 05:00 shamasynda qoǵamdyq orynda mas kúıde ózge adamnyń qadir-qasıeti men ar-namysyna nuqsan keltirgeni úshin ol QR ÁQBtK-niń 440-baby 1-bóligine sáıkes jaýapqa tartyldy», - delingen málimette.

Sondaı-aq atalǵan faktige oraı Memlekettik qyzmet isteri agenttiginiń Shyǵys Qazaqstan oblysy boıynsha departamenti tekserý júrgizdi. Ádep jónindegi keńeste Mádenıet basqarmasynyń basshysyna qatysty tártiptik is qaralyp, keńes músheleri ony jumystan shyǵarý týraly oblys ákimine usynys jasady.

13 sáýir kúni aımaq basshysy Danıal Ahmetov Mıras Jumagulovty qyzmetinen bosatty.