Isekeshev Astanada «avtobýstar jarysyn» toqtatýdyń jolyn tapty

ASTANA. QazAqparat - Astana qalasynyń ákimi Áset Isekeshevtiń aıtýynsha, jolaýshylardy tasymaldaý tapsyrys berý júıesi zaman talabyna saı kelmeıdi. Sol sebepti ákimdik "Bus kılometr" atty júıeni ázirlep shyǵardy, dep xabarlaıdy QazAqparat tilshisi.

"Qazir qalaı? Bizde 8 avtopark bar. Olar marshrýttardy alady da, jolaýshylardy kóptep jınaýǵa tyrysady. Sodan bir-birimen jarysady, jolaýshylarmen urysady. Kondýktorlar da kóp. Al "Bus kılometr" júıesi boıynsha jolaýshylardyń sany eskerilmeıdi. Negizgi mindet - sapaly qyzmet kórsetý. Biz soǵan kóshýdi kózdeımiz. Ol úshin bir jyl boıy ınvestıtsııalar mınıstrligimen jumys istep, zańnamany ózgerttik", - dedi Áset Órentaıuly búgin qalalyq kólik keshenin damytý máselerine arnalǵan partııalyq tyńdaýda.

Alaıda avtoparkter jolaýshydardyń sanyn qýalaı bermeı, qyzmet sapasyna kóńil bóletindeı jaǵdaı jasaý úshin turaqty qarjylandyrý tetigi bolýy shart. Osyǵan baılanysty ákimdik qoǵamdyq kólik salasyn qarjylandyrýdyń úsh jolyn usynyp otyr. Birinshisi - tarıf + sýbsıdııa. Ekinshisi - tarıfti, ıaǵnı bılet baǵasyn kóterý. Úshinshisi - avtobýspen tegin qatynaý. Alaıda ol úshin aı saıyn belgili bir somada jarna tóleý kerek. 

"Endi, ol salyq emes, qoǵamdyq kólikti damytý úshin alynatyn kommýnaldyq tólem tárizdi. Mysaly, qazir bir otbasy 30-40 myń teńgege jol júrý abonementin ("proezdnoı" - avt.) satyp alsa, jańa júıe boıynsha 3-aq myń teńge tóleıtin bolady. Jeke kólikpen júretin biz de úsh myńnan tóleımiz. Sonda bárimiz qoǵamdyq kólik salasyn damytýǵa aqsha quıǵandaı bolamyz. Árıne, bul máseleni áli de talqylaý qajet. Halyqtyń pikirin bilgen jón", - dep atap kórsetti Áset Órentaıuly .

"Astana LRT" kompanııasy tóraǵasynyń mindetin atqarýshy Janna Aqjanovanyń aıtýynsha, "Bus kılometr" júıesiniń basty ereksheligi sol, avtobýs júrgen árbir kılometrdiń shyǵyndary tólenedi. Sonda kólik júrgizýshileri jolaýshylar úshin jaryspaıdy, kúndelikti marshrýttaryn ǵana oryndaýǵa tyrysady. Al GPS arqyly árbir avtobýstyń qaı aıaldamada toqtaǵany, ýaqyt jıiligin saqtaǵany jáne taǵy basqa málimetter tekseriledi. "Bir jyl buryn osyndaı júıe Máskeý qalasynda engizildi. Qazirdiń ózinde onyń tıimdiligi anyq baıqalyp otyr. Avtobýstar jańardy, sany kóbeıdi. Halyq qoǵamdyq kólikpen jıi júre bastady", - deıdi Aqjanova.