Isekeshev álemge áıgili «Madison Square Garden»-niń vıtse-prezıdentin jumysqa shaqyrdy

ASTANA. QazAqparat - Astanadaǵy nysandardy tıimdi paıdalaný úshin otandyq mamandarmen arnaıy komanda qurylyp, onyń basshylyǵyna «Madison Square Garden» arenasynyń vıtse-prezıdenti Robert Ýılıams shaqyrylyp otyr. Bul týraly Elbasynyń qatysýymen elordany odan ári damytý máseleleri jónindegi májiliste shahar basshysy Áset Isekeshev aıtty, dep habarlaıdy «QazAqparat» HAA tilshisi.

«Mádenı jáne sporttyq sharalar boıynsha aıtar bolsaq, biz qaladaǵy nysandardy paıdalaný tıimdiligin arttyrý úshin arnaıy kompanııa quryp jatyrmyz. Qazirdiń ózinde «Barys Arena» jáne «Qazaqstan» sport kesheni sol kompanııaǵa tapsyryldy. Aldaǵy ýaqytta oǵan taǵy da «Astana Arena» men «Alaý» muz aıdyny, salynyp jatqan Jekpe-jek saraıy beriletin bolady», - dedi Isekeshev.

Onyń aıtýyna qaraǵanda, mundaǵy maqsat - nysandardyń halyqaralyq sertıfıkatsııasyn qamtamasyz etip, Qazaqstanda, Reseıde jáne TMD elderindegi iri mádenı jáne sporttyq sharalardy elordada ótkizý.

«Qazirgi tańda otandyq mamandarmen komanda qurylyp, onyń basshylyǵyna Madison Square Garden-niń (Nıý-Iork qalasyndaǵy jylyna 320 shara ótetin iri sporttyq arena - avt.) vıtse-prezıdenti Robert Ýılıamsty shaqyryp otyrmyz. «Barys Arenanyń» ózinde osy jyly 70-ke jýyq shara ótkizilmek. Oǵan 500 myńǵa jýyq kórermen keledi dep josparlanýda. Al jalpy, jyl boıy qalada ártúrli aýqymdaǵy 700-ge jýyq shara ótkiziledi», - dedi qala basshysy.