Isekeshev 130 astanalyq januıaǵa páter kiltterin tabystady

ASTANA. QazAqparat - Áset Isekeshev Kenen Ázirbaev kóshesi, 14 mekenjaıynda salynǵan úıdiń turǵyndaryna kiltterdi tapsyrdy. Búgin halyqtyń áleýmettik az qamtylǵan toptaryna jáne bıýdjettik mekeme qyzmetkerleri sanatyna jatatyn kezekte turǵan 130 otbasy jańa qonysqa ıe boldy, dep habarlaıdy elorda ákimdiginiń resmı saıty.

Jańa úıdi «Nurly jer» turǵyn úı qurylysy baǵdarlamasyn iske asyrý sheńberinde «Tımýr-Qurylys» JShS salyp shyqty.

«Men prezıdenttik baǵdarlama boıynsha kilt alǵan 130 otbasynyń barlyǵyn quttyqtaǵym kelip otyr. Jańa páter sizderge jáne jaqyndaryńyzǵa baqyt, jylýlyq pen bereke ákelsin dep tileımin», - dedi qonys toı ıelerin quttyqtaǵan Áset Isekeshev.

Bıyl 1000 páterden astam 6 kóppáterli turǵyn úıdi paıdalanýǵa berý josparlanyp otyr, onyń ishinde «Nurly jer» turǵyn úı qurylysy baǵdarlamasy boıynsha - 386 páter jáne kezektegiler úshin jalǵa beriletin baǵyt boıynsha - 677 páter.

Búgin saltanatty marapattaýdan keıin № 63 kezekte turǵan muǵalim Dınara Tabyldyqyzy óz páteriniń esigin ashyp kirdi.

«Astananyń 20 jyldyǵyn merekeleý qarsańynda jáne qasıetti Ramazan aıynda men ishki árleýi jaqsartylǵan jańa páterimniń kiltin alyp jatyrmyn. Endi zattarymdy jıystyryp, kóship kele berýime bolady. Elimizde osyndaı memlekettik baǵdarlamanyń júzege asyrylyp, sonyń arqasynda muǵalimder men dárigerlerge baspananyń qoljetimdi bolyp jatqanyna óte qýanyshtymyn», - dedi Dınara Tabyldyqyzy.

Qazirgi tańda demografııalyq úderis pen kóshi-qon aǵynyn esepke alǵanda baspanaǵa muqtajdar sany artyp keledi. Astanada kezekte turǵandar sany - 48 722 adam.