«IRS» jýrnaly qazaq tilinde jaryq kórdi

ASTANA. QazAqparat - Ázerbaıjan elshiligi eki eldiń dıplomatııalyq qarym-qatynastaryna 25 jyl tolýyna oraı saltanatty qabyldaý uıymdastyrdy. Sol jerde Ázerbaıjannan shyǵatyn «IRS» atty xalyqaralyq jýrnaldyń qazaq tilindegi nusqasy tanystyryldy, dep xabarlaıdy QazAqparat tilshisi.

«25 jyl kóp ýaqyt emes, degenmen táýelsiz memleketter úshin bul - ǵasyrmen birdeı kezeń. Osy ýaqyt ishinde biz ekijaqty baılanystarymyzdy saqtap qana qoımaı, dostyq qarym-qatynasymyzdy kúsheıtip, strategııalyq áriptestikke deıin kótere bildik. Oǵan jalpyulttyq kóshbasshymyz Geıdar Álıev te, Ult kóshbasshysy Nursultan Nazarbaev ta, Ázerbaıjannyń qazirgi prezıdenti Ilxam Álıev te qomaqty úlesterin qosty. Bizdiń tarıxymyz bir, dinimiz ortaq, mádenıetimiz ben tilimiz uqsas. Osynyń bári ekijaqty baılanystardy turaqty túrde damytýǵa negiz bolyp otyr», - dedi óz sózinde Ázerbaıjan prezıdentiniń keńesshisi Álı Gasanov.
 

Onyń aıtýynsha, búginde Ázerbaıjannan Qazaqstanǵa kólik bólshekteri, aýyl sharýashylyǵy ónimderi jáne taǵy basqa taýarlar tasymaldanady. Al Qazaqstan jaqtan xımııa shıkizaty, qara metaldar, elektr qondyrǵylar sııaqty ónimder eksporttalady. Elimizde ázerbaıjandyq ınvestorlardyń qatysýymen 800 kompanııa ashylǵan. Investıtsııalardyń jalpy kólemi 200 mln dollardy qurap otyr.

Búgingi shara barysynda Ázerbaıjan prezıdentiniń keńesshisi Álı Gasanovǵa qazaq shapany jabyldy. Oǵan jáne osy eldiń birqatar dıplomattaryna arnaıy medaldar da tabystaldy.

Budan bólek, ázerbaıjandyq «IRS» atty xalyqaralyq jýrnaldyń qazaq tilindegi nusqasy tanystyryldy. «Mura» dep aýdarylatyn basylymnyń arnaıy nómirinde eki eldiń syrtqy ister mınıstrleri, depýtattary men ǵalymdarynyń maqalalary berilgen.

Aıta ketken jón, «IRS» jýrnaly 15 tilde 70-ke memlekette taratylady.