Irlandııamen aradaǵy Konventsııa esebinen «Eır Astananyń» reısteri artady

ASTANA. QazAqparat - Irlandııamen aradaǵy qosarlanǵan salyq salýdy boldyrmaý Konventsııasy esebinen «Eır Astana» baǵdarlary artatyn bolady. Bul týraly Senattyń Qarjy jáne bıýdjet komıtetiniń keńeıtilgen otyrysynda Qarjy vıtse-mınıstri Qanat Baedilov málim etti, dep habarlaıdy QazAqparat.

Otyrys barysynda «Qazaqstan Respýblıkasynyń Úkimeti men Irlandııa Úkimeti arasyndaǵy tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly Konventsııa jáne oǵan Hattamany ratıfıkatsııalaý týraly» zań jobasy talqylandy.

«Qazaqstan Respýblıkasy EYDU-ǵa kiretin elderdiń  barlyǵymen salyq konventsııasyn jasasýǵa tyrysýda. Irlandııa EYDU-ǵa kiretin elderdiń quramynda. Budan basqa, ushý ýaqyty 7 saǵat ishindegi iri qalalarmen tikeleı áýe qatynastaryn ashý týraly QR Prezıdentiniń tapsyrmasyna baılanysty baǵdar jelilerin keńeıtýdi, sondaı- aq bir bóligin lızıng shartymen satyp alý kózdeletin ushaqtar parkin ulǵaıtýdy josparlap otyrǵan «Eır Astananyń» ótinishi qaraldy», - dep toqtaldy Qanat Baedilov. 

Onyń sózine qaraǵanda, qazirgi tańda osyndaı áýe kemelerin usyný boıynsha kóshbasshylardyń biri Irlandııa bolyp otyr. Bul el áýe bıznesi damyǵan jáne zamanaýı eýropalyq áýe kemelerin jalǵa alý mólsherlemesi boıynsha balamaly nusqalar usynady. Irlandııada ushqyshtar quramy úshin mamandandyrylǵan oqý ortalyqtary bar. Olar Qazaqstanda áýe bıznesti damytý úshin halyqaralyq tájirıbe almasýǵa turǵysynda taǵylymdama beredi. Bul baǵyttaǵy qadamdar EO elderine qatynaıtyn reısterdiń jıiligin ulǵaıtýǵa, áýe kemeleriniń parkin keńeıtýge yqpal etedi.

Onyń atap ótýinshe, osy Konventsııa áýe kemelerin jalǵa berýden alynǵan Irlandııa kásipornynyń tabysyna qosarlanǵan salyq salýdy boldyrmaýǵa múmkindik beredi. «Eır Astana» úshin jaldaý tóleminiń somasyn Konventsııa bolmaǵan jaǵdaıda jaldaý tóleminen ustalatyn salyq somasyn azaıtý artyqshylyǵy bar.

Sóz sońynda ol osy tektes konventsııany birqatar eldermen bekitý josparlanyp otyrǵandyǵyn atap ótti.

Aıta keteıik, Konventsııa birinshiden, ýaǵdalasýshy memleketterdiń arasynda salyq salý quqyqtaryn bólý jolymen ýaǵdalasýshy memleketterdiń rezıdentteri bolyp tabylatyn zańdy jáne jeke tulǵalardyń tabystaryna qosarlanǵan salyq salýdy joıýǵa múmkindik beredi. Ekinshiden, ınvestıtsııalar úshin qolaıly jaǵdaı jasaý jolymen Qazaqstan men Irlandııa arasyndaǵy ekonomıkalyq yntymaqtastyqty nyǵaıtýǵa, keńeıtýge jol ashady. Úshinshiden, eki memlekettiń quzyretti organdary arasynda salyq máseleleri boıynsha aqparat almasý arqyly salyqtan jaltarýdyń aldyn alý máselelerin sheshýge kómektesedi.