Irkýtskte adamdardyń «Dolana» suıyqtyǵynan ýlanýyna baılanysty qazaqstandyqtarǵa eskertý jarııalandy

ASTANA. QazAqparat - Qazaqstan Respýblıkasy Ulttyq ekonomıka mınıstrliginiń Tutynýshylardyń quqyqtaryn qorǵaý komıteti (budan ári - Komıtet) Reseı Federatsııasynyń buqaralyq aqparat quraldaryna silteme jasaı otyryp, RF Irkýtsk oblysy turǵyndarynyń jappaı ýlanýynyń tirkelý faktileri týraly habarlady.

Málimetterge súıensek, jappaı ýlaný aǵymdaǵy jylǵy 17-18 jeltoqsanda quramynda metıl spırti (metanol) bar «Dolana»  suıyqtyǵyn tutynýdan keıin oryn alǵan. Irkýtsk oblysynda joǵaryda atalǵan suıyqtyqty tutynýdan keıin qaıtys bolǵandar sany  61 adamǵa jetken.

Komıtet Reseıde bolǵan jaǵdaıǵa alańdaýly jáne Qazaqstan Respýblıkasynyń turǵyndaryn ártúrli alkogol ónimderi men joǵaryda kórsetilgen «Dolana» suıyqtyǵyn satyp alý kezinde muqııat jáne abaı bolýǵa shaqyrady.

«Qurmetti kásipkerler! Atalǵan suıyqtyq qaýipsizdik talaptaryna sáıkes kelmeıdi jáne satylymǵa jiberilmeýi tıis.  Belgilenbegen saýda oryndarynan satyp alynǵan jáne rastaıtyn qujattary joq alkogol sýsyndary qoldan jasalǵan bolýy jáne ómir men densaýlyqqa qaýip tóndirýi múmkin» delingen habarlamada.