Іriktelgen 300 kadrdyń barlyǵy da Prezıdent talaptaryna saı - Aqerke Berlibaı

NUR-SULTAN. QazAqparat - QR Prezıdenti janyndaǵy Memlekettik basqarý akademııasynyń baspasóz hatshysy Aqerke Berlibaı Prezıdenttik jastar kadr rezervi týraly pikir bildirdi, dep habarlaıdy QazAqparat tilshisi.

«Men osy joba uıymdastyrýshylarynyń birimin. Bul jobanyń kontseptsııasyn qurýdan bastap búginge deıin qandaı protsester bolǵanyn basynan aıaǵyna deıin kórdim. Shynymen de, bul - biregeı joba. Sondaı-aq irikteý kezeńderi ashyq ári ádil ótti. Bizdiń úmitimiz aqtaldy, sebebi bul jobaǵa qazaqstandyq qana emes, sheteldik jastardyń da qyzyǵýshylyǵy joǵary boldy», - deıdi Aqerke Berlibaı.

Onyń aıtýynsha, baıqaý jarııalanǵan kezde 13 myńnan astam adam ótinim bergen.

«7312 adam tolyq tirkelip, birinshi kezeńge ótti. Mine, osy adamdar jobaǵa ne maqsatpen qatysyp jatqanyn, jobadan ne kútetinin anyq bildi. Al sońǵy kezeńnen súrinbeı ótken 300 qatysýshynyń bolashaǵy jarqyn, sebebi olar - talantty, óte aqyldy, bilikti mamandar. Men olardyń árqaısysyn jeke tanımyn, sebebi ártúrli kezeńderde olarmen sóılesip, suhbat aldym», - deıdi baspasóz hatshysy.

Sondaı-aq, ol jobaǵa memlekettik qyzmetshiler ǵana qatyspaǵanyn aıtty.

«Іrikteýden ótken 300 adamnyń 96-sy ǵana - memlekettik qyzmetshiler. Kóbi jeke sektordan qatysýshylar. Prezıdentimiz Qasym-Jomart Toqaev memlekettik qyzmettiń ashyq bolǵanyn qalap, qalyptasyp qalǵan stereotıpterdi buzǵysy kelse, iriktelgen 300 adam osy talaptarǵa tolyq saı keledi. Olar memlekettik qyzmettegi stereotıpterdi joıyp, ishinen memlekettik qyzmet salasyn ózgertetin jańa kóshbasshylar shyǵady», - deıdi ol.