Irıkla sý qoımasynan BQO-ǵa keletin aǵyn seıildi – TJD

<p>ASTANA. KAZINFORM &ndash; Batys Qazaqstan oblysy Tótenshe jaǵdaılar departamenti bastyǵynyń orynbasary Qanat Qarabalaev eldegi sý tasqynyna baılanysty Reseıdiń Qazaqstanmen shekaralas oblystary Tótenshe jaǵdaılar vedomstvosymen jedel habar alysyp otyrǵanyn aıtty.</p>

«Elimizben shekaralas Reseı Federatsııasy 5 oblysynyń Tótenshe jaǵdaılar vedomstvosymen ózara is-qımyl aıasynda transshekaralyq ózenderdiń jaǵdaıy boıynsha jedel aqparat almasyp otyrmyz. Reseı tarapynyń aqparaty boıynsha (8 sáýir) Irıkla sý qoımasynda aǵyn seıildi, ıaǵnı sekýndyna 1670 tekshe metrden, 140 tekshe metrge azaıdy. Sonymen qatar, Elek jáne Jaıyq ózenderinde sý deńgeıiniń kóterilýine baılanysty Ýspenovka, Qarashyǵanaq, Dımıtrovo, Jańatalap, Jarsýat eldi mekenderin sý basý qaýpi saqtalýda. Dımıtrovo jáne Qarashyǵanaq eldi mekenderinen 25 adam (1 bala) aldyn ala evakýatsııalandy, qalǵan turǵyndar óz betinshe týystaryna ornalasty», - dedi Qanat Qarabalaev Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, TJD ókili búgingi aýa raıymen tanystyrdy. 

«8 sáýirge arnalǵan aýa raıy boljamy boıynsha, túnde oblystyń shyǵysynda azdap jańbyr jaýady. Túnde jáne tańerteń oblystyń batysynda, ońtústiginde tuman kútiledi. Jel soltústik-batys, batys 9-14 m/s. aýa temperatýrasy túnde 3-8, kúndiz 13-18 gradýsqa jylıdy», - deıdi spıker. 

Aıta ketsek, 4 sáýirde Orynbordaǵy Irıkla sý qoımasynan sekýndyna 1600 tekshe metr sý jiberilip jatyrǵany týraly habarlaǵan edik.

Buǵan deıin BQO Tótenshe jaǵdaılar departamenti bastyǵynyń orynbasary Jaıyq jáne Shaǵan ózeni sýynyń kóterileýine baılanysty Oral qalasynda baqylaýdyń kúsheıtilgenin aıtty. 

Eske sala ketsek, 4 sáýirde Memleket basshysy Batys Qazaqstan oblysynda sý tasqynyna baılanysty jaqyn mańdaǵy aýyldardan kóshirilgen turǵyndarmen kezdesken edi. 

6 sáýirde Batys Qazaqstan oblysynyń ákimi Narıman Tóreǵalıev óńir turǵyndaryna sý tasqynyna qatysty qalyptasqan jaǵdaı boıynsha úndeý joldady.