Іri sý qoımalarynyń ortasha tolýy 60-75 paıyzdy quraıdy - Azıdýllın

ASTANA. QazAqparat – Respýblıka aýmaǵyndaǵy iri sý qoımalarynyń ortasha tolýy 60-75 paıyzdy quraıdy. Bul týraly Ekologııa jáne tabıǵı resýrstar vıtse-mınıstri Ǵalıdolla Azıdýllın aıtty, dep habarlaıdy QazAqparat tilshisi.

«Respýblıka aýmaǵyndaǵy iri sý qoımalarynyń ortasha tolýy 60-75 paıyzdy quraıdy. Іri sý qoımalaryna aǵynnyń kútiletin kólemi norma sheginde. Barlyq sý qoımalarynda sý qabyldaýǵa arnalǵan bos kólemder bar. Sý qoımalar bekitilgen jumys rejımine sáıkes jumys atqarýda. Sonymen qatar, Syrdarııa ózeni basseınindegi sý sharýashylyǵy jaǵdaıy turaqty baqylaýda ekenin atap ótemin. Syrdarııa ózeninde muzdyń jınalýyna jáne qabyrshaq muz ótýine baılanysty tótenshe jaǵdaılardyń aldyn alý úshin kún saıyn tıisti organdarmen monıtorıng jáne aqparat almasý jumystary júrgizilýde», - dedi ol Ortalyq kommýnıkatsııalar qyzmetindegi baspasóz máslıhatynda.

Vıtse-mınıstrdiń dereginshe, búginde Shardara sý qoımasynyń kólemi - 4 669 mln, Kóksaraı sý rettegishiniń kólemi 1407 mln tekshe metrdi quraıdy. Shardara sý qoımasynda 531 mln, Kóksaraı sý rettegishinde 393 mln tekshe metr bos oryn bar.

«Qazirgi ýaqytta qaýipsizdikti jáne úzdiksiz jumysty qamtamasyz etý maqsatynda Qyzylorda sý toraby, Áıtek sý toraby, Qazaly sý toraby jáne Aqlaq sý toraby paıdalaný qaǵıdalaryna sáıkes tranzıttik rejımge aýystyryldy. Sý sharýashylyǵy jaǵdaıy ózgergen kezde Shardara sý qoımasynyń jumys rejımi qaıta qaralatyn bolady. Atalǵan másele mınıstrliktiń aıryqsha baqylaýynda», - dedi Ǵalıdolla Azıdýllın.