Іri somada bıýdjet qarajatyn ıgere almaı jatqan mınıstrlikter ataldy

NUR-SULTAN. QazAqparat –QR Premer-Mınıstriniń orynbasary – Qarjy mınıstri Erulan Jamaýbaev Úkimet otyrysynda jyldyń 8 aıynda respýblıka bıýdjetiniń 49 mlrd teńgesi ıgerilmeı qalǵanyn málim etti, dep habarlaıdy QazAqparat tilshisi.

«Memlekettik bıýdjettiń shyǵysy 98,4%, respýblıkalyq bıýdjettiń shyǵysy – 99,5%, jergilikti bıýdjetterdiń shyǵysy 97,6% atqaryldy.

Respýblıkalyq bıýdjet boıynsha 11,7 trln teńge somasyna shyǵystar júrgizildi.

Atqarylmaý 60 mlrd teńgeni qurady, onyń ishinde 11 mlrd teńge – únemdeý. Igerilmegeni – 49 mlrd teńge», - dedi mınıstr.

Aıtýynsha, ıgerilmeýdiń neǵurlym iri somalary Іshki ister, Qorǵanys, Tótenshe jaǵdaılar jáne Oqý-aǵartý (Ǵylym jáne joǵary bilim mınıstrligi) mınıstrlikterinde qalyptasqan.

«Igerilmeýdiń negizgi sebepteri: konkýrstyq rásimderdi uzaq ótkizý, oryndalǵan jumystar aktilerin, shot-faktýralardy ýaqtyly usynbaý, sharttardy, qosymsha kelisimderdi jasasý rásimderin uzaq júrgizý, tólemderdiń naqty kórsetilgen qyzmet kólemi úshin júrgizilýi, esepti aıda qarajattyń shyǵyndalýyna qajettiliktiń bolmaýy», - dedi Erulan Jamaýbaev.