Іri saýda ortalyqtary men bazarlardyń qyzmeti tsıfrlandyrý arqyly baqylaýǵa alynady

ASTANA. QazAqparat – Elimizdegi iri saýda ortalyqtary men bazarlardyń qyzmetin tsıfrlandyrý arqyly baqylaýǵa alynady. Ol úshin arnaıy aqparattyq júıe qurylmaq. Bul týraly Saýda jáne ıntegratsııa birinshi vıtse-mınıstri Arman Shaqqalıev málim etti, dep habarlaıdy QazAqparat tilshisi.

«Bizdiń mınıstrlik saýda salasyndaǵy zańnamalyq reformalar boıynsha aıtarlyqtaı jumys atqardy. Saýda naryǵy men iri saýda obektilerine arnalǵan naqty erejeler belgilendi. Sonymen qatar alǵash ret otandyq taýar óndirýshilerdi ımporttyq ónimniń dempınginen qorǵaý tetigi engizildi. Áleýmettik mańyzy bar azyq-túlik baǵasyn belgileýde saýda qyzmetin retteý týraly zańnamanyń saqtalýy men memlekettik baqylaýdyń biryńǵaı tetigin júrgizýdiń naqty algorıtmi ázirlendi. Odan bólek, iri saýda obektileri men bazarlar (2000 sharshy metrden asatyn) qyzmetin tsıfrlandyrý arqyly aqparattyq júıe qurý qarastyrylýda», - dedi Arman Shaqqalıev ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, atalǵan ózgerister saýda naryǵy qyzmetiniń ashyqtyǵyn qamtýǵa jáne shaǵyn bıznesti bazar ıeleri tarapynan negizsiz kórsetiletin qysymnan qorǵaýǵa baǵyttalǵan.

«Saýda salasyn retteıtin 52 akti qaıta qaraldy. Onyń barysynda belgilengen bazalyq saýda sharttaryna sáıkes kelmeıtin 543 talap anyqtaldy. Bul jalpy retteýshi aktiniń 31% qurady. Sondaı-aq, barlyq normatıvtik aktiler kásipkerlik kodekstiń jańa talaptaryna sáıkes keltirildi», - deıdi ol.

Buǵan deıin birinshi saýda vıtse-mınıstri arzan azyq-túlikti qaıdan alýǵa bolatynyna qatysty pikir bildirgen edi.

Sondaı-aq, brıfıng barysynda jyl basynan beri elimizde azyq-túlik baǵasy 3,5%-ǵa óskeni aıtyldy.