Іri ónerkásiptik kásiporyndar Astana aýmaǵynan tysqary shyǵarylady
Bul týraly búgin Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.
«2030 jyly aglomeratsııa aýmaǵynda 3 ındýstrııalyq aımaq qurý arqyly Astana qalasynan iri ónerkásiptik kásiporyndardy shyǵarý usynyp otyr. Sondaı-aq jańadan qurylatyn óndiristik kásiporyndardy ındýstrııalyq aımaqtarǵa ornalastyrý josparlanýda. Jobada birinshi ındýstrııalyq aımaqty Arshaly aýdanyndaǵy Arshaly aýylyna ornalystyrý usynylady. Óıtkeni Astana-Temirtaý-Qaraǵandynyń bel ortasynda ornalasqan onyń ekonomıkalyq-geografııalyq jaǵdaıy qolaıly», - dedi Jeńis Qasymbek.
Mınıstrdiń aıtýynsha, halyqaralyq joǵary jyldamdyqty magıstral, sondaı-aq temirjol ornalasqan Shortandy aýdanyndaǵy Tóńkeris aýylyna ekinshi ındýstrııalyq aımaqty ornalastyrý josparlanyp otyr.
«Úshinshi ındýstrııalyq aımaqty Tselınograd aýdanyna qarasty Jaınaq aýylyna ornalastyrý kózdelgen. Onda qalyptasqan ınfraqurylymnyń, atap aıtqanda, jumys istep turǵan elektr qosalqy stansasynyń bolýy osy eldi mekendi tańdaýǵa sebep boldy. Búgingi kúni óndiristik maqsatqa alańy 100 gektar jer ýchaskesi bólindi», - dedi ol.
Onyń paıymynsha, salany ártaraptandyrý jáne qarqyndatý esebinen aýyl sharýashylyǵy ónimderin óndirý 170 paıyzǵa ulǵaıady. Astana qalasynyń azyq-túlikke, onyń ishinde unǵa, qaraqumyqqa, sútke, burshaq daqyldaryna, qus etine jáne taǵy basqa ónimderge degen qajettiligi aglomeratsııa aýmaǵy esebinen tolyq qamtamasyz etiletin bolady.
«Aglomeratsııa ózeginiń beton, temirbeton kirpish, qıyrshyqtas, metall konstrýktsııalary, aǵash buıymdary sııaqty qurylys materıaldaryna suranysty aglomeratsııa aýmaǵynda ornalasqan kásiporyndar tolyqtaı qamtamasyz etetin bolady», - dedi Jeńis Qasymbek.