Іri kásiporyndar qazynaǵa kóbirek tólem túsirýi kerek - Memleket basshysy

ASTANA. QazAqparat – Memleket basshysy Qasym-Jomart Toqaev VIII saılanǵan QR Parlamentiniń birinshi sessııasynda sóılegen sózinde ekonomıkany monopolııadan aryltý jumystaryna toqtaldy, dep habarlaıdy QazAqparat tilshisi.

«Іri kásiporyndar jáne shıkizat eksportymen aınalysatyn kompanııalar qazynaǵa kóbirek tólem túsirse, ádildik bolar edi. Bul – álemde bar ozyq tájirıbe. Qazir eldegi jaǵdaı túbegeıli ózgerdi. Ádiletti Qazaqstan degenimiz – jalań uran emes, bul – anyq aqıqat. Alda atqaratyn jumys kóp. Biz buǵan bir el bolyp túgel atsalysýymyz kerek», - dedi Qasym-Jomart Toqaev.

Prezıdent ótken jyldyń basynan beri ekonomıkany monopolııadan aryltý jumystary júrgizilip kele jatqanyn aıtty.

«Bul – Úkimetten erik-jiger men joǵary kásibılikti talap etetin kúrdeli protsess. Bul jumysty jalǵastyrǵan jón. Transfertti baǵa belgileý, halyqaralyq salyq salý, sýbsıdııa men memlekettik resýrstardy bólý kezinde baqylaýdy qamtamasyz etetin túsinikti jáne tıimdi quraldardy qoldanysqa engizý qajet», - dedi Memleket basshysy.

Jalpy, orta jáne shaǵyn kásipkerlikti qoldaý saıasaty memleketimizdiń uzaq merzimge arnalǵan turaqty strategııasyna aınalýy kerek.

«Aq jol» partııasy shaǵyn jáne orta bıznesti damytý, ekonomıkany monopolııadan aryltý týraly únemi aıtyp júr. Partııanyń Májilistegi depýtattary osy jumysqa óz úlesin qosady dep senemin. Sondaı-aq, kásipkerlerdiń bastamasymen qurylǵan Respublica partııasy Parlamentke ótti. Bul uıym bıznestiń damýyna qolaıly jaǵdaı qalyptastyrýǵa atsalysady dep oılaımyn», - dedi Prezıdent.

Aıta keteıik, elordada VIII saılanǵan Qazaqstan Respýblıkasy Parlamentiniń birinshi sessııasy ashyldy. Parlament palatalarynyń birlesken otyrysy respýblıkalyq telearnalarda jáne áleýmettik jelilerde tikeleı efırden kórsetilip jatyr. Jıynǵa jańadan saılanǵan depýtattar, memlekettik organdardyń basshylary, Ulttyq quryltaı músheleri, qoǵam qaıratkerleri qatysyp otyr.