Іri áýe kompanııalaryna avıaotyn satýǵa tyıym salý usynyldy

NUR-SULTAN. QazAqparat – Májiliste ótken dóńgelek ústelde Básekelestikti qorǵaý jáne damytý agenttiginiń tóraǵasy Serik Jumanǵarın avıakerosın naryǵyn retteýdiń jańa tásilin tanystyrdy, dep habarlaıdy QazAqparat tilshisi.

«Avıakerosındi satý naryǵynda áýejaılar ózderiniń tarıftik saıasatyna táýeldi. Óıtkeni negizgi kiristi avıakerosındi qaıta satý arqyly taýyp otyr. Avıatsııalyq otynnyń 72%-yn eki kompanııa baqylaıdy. Olar: 54% úlesi bar «PetroSun» JShS men 18% úlesi bar «QazMunaıGaz» AQ. «PetroSun» JShS-nen kóbinese «AirAstana» AQ (45%), «Nursultan Nazarbaev halyqaralyq áýejaıy» AQ (17%), «Scat» JShS «13%), «Vınes treıdıng» JShS (9%), «Almaty halyqaralyq áýejaıy» AQ (8%), «Qazaqair» AQ (3,3%) satyp alady. «QazMunaıGaz» AQ-nyń avıaotynyn túgeldeı «QazMunaıGaz Aero» AQ satyp alady», - dep túsindirdi Serik Jumanǵarın.

Agenttik tóraǵasy byltyr ishki naryqqa arnalǵan avıotynnyń 10% satý taýar bırjalary arqyly satylǵanyn atap ótti.

«Bul jaqsy tájirıbe boldy. Atyraý munaı óńdeý zaýytyndaǵy avıatsııalyq otynnyń ortasha ólshengen ındeksi tonnasyna 247 myń teńgeden boldy. Biz bıyl jolaýshylar aǵynynyń kólemi 2 mln tonnadan asatyn áýejaılardyń avıakerosın satýyna tyıym salýdy usynyp otyrmyz. Óıtkeni olar avıakerosın satý úshin qurylǵan joq. Qyzmet kórsetý salasyn damytýy kerek», - dedi agenttik basshysy.