Irannan kelgen jolaýshylar karantınge jabylady

ALMATY. QazAqparat – Almaty halyqaralyq áýejaıy koronavırýs juqpasyna baılanysty Irannan kelgen jolaýshylardy da karantınge jabatyn boldy, dep habarlaıdy QazAqparat tilshisi.

Bul týraly áýejaıdyń áleýmettik jelidegi paraqshasynda jarııalandy.

QR Bas sanıtarlyq dárigeriniń «Qazaqstan Respýblıkasynda koronavırýs juqpasynyń profılaktıkalyq sharalaryn kúsheıtý týraly shara qabyldaý» jónindegi qaýlysyna sáıkes 1 naýryzdan bastap COVID-19 juqpasynan qaýipti elderdiń sanaty qaıta jasaldy.

«Birinshi sanattaǵy jolaýshylar eki toqa bólindi. A tobyna QHR men Irannan kelgen jolaýshylar jatqyzyldy. Bul elden kelgender 14 kúnge karantınge jabylady. B tobyna Gonkong, Makao, Taıvan, Ońtústik Koreıa, Italııa jáne Japonııa elderi jatqyzyldy. Bul elden kelgenderge adam kóp shoǵyrlanǵan jerlerge barýǵa tyıym salynady. 14 kún ishinde úılerinde bastapqy medıtsınalyq kómek kórsetý qyzmetiniń baqylaýynda bolady. Ekinshi sanatqa Sıngapýr, Taıland, Ázerbaıjan elderi jatqyzyldy. Bul elden kelgender turǵylyqty jeri boıynsha 14 kún medıtsına qyzmetkerleriniń baqylaýynda bolmaq. Úshinshi sanat - Germanııa, AQSh, BAÁ, Ulybrıtanııa, Frantsııa, Bahreın, Kýveıt, Ispanııa, Malaızııa elinen kelgender de turǵylyqty mekenjaıy boıynsha 24 kún medıtsına qyzmetkerleriniń baqylaýynda bolmaq», - dedi áýejaıdyń baspasóz qyzmetinen.

Munyń aldynda qabyldanǵan qaýlyda 1 sanatta tek Qytaıdan kelgen jolaýshylar ǵana bolǵan.