Iranmen ıadrolyq kelisimge kelý múmkindigine baılanysty munaı baǵasy tómendedi

AMMAN. QazAqparat – Iranmen ıadrolyq kelisimdi jańartý jónindegi kelissózderden keıin munaı baǵasy barreline 1 dollardan astam arzandady. Tegeran eksportty ulǵaıtýy múmkin, dep habarlaıdy QazAqparat tilshisi Reuters aqparat agenttigine silteme jasap.

Keshe Eýropalyq Odaq 2015 jylǵy Iran ıadrolyq kelisimin qalpyna keltirý týraly sheshim jobasynyń sońǵy mátinin usyndy. Eýroodaq joǵary laýazymdy sheneýniginiń aıtýynsha, túpkilikti sheshim qabyldanýy úshin AQSh pen Irannyń maquldaýy qajet. Bul másele «birneshe aptanyń ishinde» aıaqtalýy múmkin.

Osy rette Brent markaly munaı búgin 1,34 dollarǵa nemese 1,4%-ǵa arzandap, barreli 95,31 dollarǵa baǵalandy. Al, AQSh-tyń West Texas Intermediate (WTI) markaly munaıy 1,25 dollarǵa nemese 1,4%-ǵa arzandady, onyń barreli 89,51 dollar turady.

Resmı túrde Birlesken jan-jaqty áreket jospary (JCPOA) dep atalatyn Irannyń ıadrolyq kelisimin qalpyna keltirý týraly kelissózder bes aılyq úzilisten keıin ótken aptada Venada qaıta jalǵasty.

Al, 5 tamyzda Brent markaly munaı 92,78 dollarǵa deıin quldyrady, bul – osy jylǵy aqpannan bergi eń tómengi baǵa. Buǵan Anglııa bankiniń tórtinshi toqsanda Ulybrıtanııa ekonomıkasy 15 aıǵa sozylatyn retsessııaǵa enetinin eskertýi sebep boldy.

Baǵanyń tómendeýiniń taǵy bir belgisi – Qytaıǵa shıki munaı ımportynyń azaıýy boldy, keden málimetterine sáıkes, bul kórsetkish shildede ótken jylmen salystyrǵanda 9,5% tómendegen.

Naryq AQSh-tyń munaı jetkizý týraly apta saıynǵy esebiniń sońǵy raýndyn kútip otyr. Eń aldymen, Amerıka munaı ınstıtýtynyń esebi Nur-Sultan ýaqytymen erteń saǵat 2:30-da shyǵady.

Foto: www.reuters.com