Iranǵa halal ónimderdi eksporttaýda problema joq - mınıstr

ASTANA. QazAqparat - Iranǵa halal ónimderi eksporttaý boıynsha eshqandaı problema bolmaıdy. Bul týraly Parlament Májilisiniń jalpy otyrysynda Ulttyq ekonomıka mınıstri Rýslan Dálenov málim etti, dep habarlaıdy QazAqparat tilshisi.

Otyrys barysynda depýtat Darhan Myńbaı otandyq taýar óndirýshiler Iranǵa halal ónimdi eksporttaýǵa qandaı deńgeıde ázir ekenin surady.

«Kelisimge sáıkes, taraptar tehnıkalyq reglamentterdi ózara saýdada kedergiler bolmaıtyndaı etip qoldanýdy qamtamasyz etýi tıis. Ózderińiz bilesizder, Iran ımporttalatyn aýyl sharýashylyǵy ónimine halal standarttar boıynsha tıisti talaptar qoıady. Osyǵan baılanysty bizdiń otandyq óndirýshiler qanshalyqty osy standarttar boıynsha jumys isteýge daıyn?», - dedi depýtat.

Óz kezeginde Ulttyq ekonomıka mınıstri Rýslan Dálenov búginde Qazaqstanda halal ónimderdi shyǵaratyn óndirýshiler bar ekenin aıta kele: «Olardyń ónimderi halal standarttaryna sáıkes keledi. Sol sebepti ózara saýdada kedirgi bolmaıdy», - dedi.

Aýyl sharýashylyǵy vıtse-mınıstri Erlan Nysanbaevtyń sózine qaraǵanda, Iranmen arada veterınarlyq-sanıtarlyq talaptar sáıkestendirilgen.

«Sonymen birge, biz Islam yntymaqtastyǵy uıymynyń múshesimiz. Halal ónimin eksporttaý úshin arnaıy sertıfıkat qarastyrylmaǵan. Maldy jibererdiń aldynda Iran tarapynan veterınar kelip, ózderi baqylaý jasaıdy. Búginde bizde eshqandaı problema joq, ótken jyly 2 200 tonna qoı etin eksporttadyq», - dedi E. Nysanbaev.

Budan buryn habarlanǵandaı, Qazaqstan taýarlaryn Iranǵa eksporttaý jeńildeıdi.