Irandyq ınvestor Báıdibek aýdanynda kirpish zaýytyn salady

TÚRKІSTAN. QazAqparat - Túrkistan oblysyna qarasty Báıdibek aýdanynyń ákimi Baqytbek Tanagózov Irandyq «Faradid Meehan» kompanııasynyń halyqaralyq baılanys jónindegi dırektory Abdolreza Shohýd Talabpen kezdesti. Iran elinen kelgen kásipker atalǵan aýdanda kirpish zaýyty salǵysy keletinin jetkizdi, dep habarlaıdy QazAqparat tilshisi.

Iran eliniń beldi kásipkerimen kezdesýde aýdan basshysy elimizdiń tereń tarıhy men salt-dástúrlerin aıtyp, aldaǵy ýaqytta yntymaqtastyq aıasynda tyǵyz jumys jasaıtynyn jetkizdi. Sonymen qatar, ıran jurtymen ónerkásip salasynda áriptestik ornatýǵa yntaly ekenin atap ótti.

Óz kezeginde Irandyq Abdolreza Shohýd Talab bastapqyda aýdanǵa qomaqty kólemde ınvestıtsııa salyp, yntymaqtastyq ornatýǵa daıyn ekenin aıtty. Kelissózder nátıjesinde Báıdibek aýdanynyń ákimdigi men Irandyq «Faradid Meehan» kompanııasynyń halyqaralyq baılanys jónindegi dırektory Abdolreza Shohýd Talabpen jáne "SPK " Túrkistan AQ fılıal dırektory N.Ilıasov arasyndaǵy ózara túsinistik memorandýmy túzildi. Atalǵan qujat aıasynda Báıdibek aýdany Boraldaı aýyldyq okrýgindegi ındýstrıaldy aımaqtan arnaıy jer bólinip, kirpish zaýyty ashylatyn bop kelisildi.

Aıta keterligi, ırandyq ınvestor aýdannan soǵylatyn zaýytta kirpishtiń 7 túrin shyǵarmaq. 200-ge jýyq adamdy jumyspen qamtyp, bir aıda 4-5 mln, jylyna 60-70 mln kirpish shyǵarýdy josparlap otyr. Sonymen qatar joba iske asqannan soń, keler jyly taǵy 10 mln teńge kóleminde qarjy quıýdy kózdep otyr.