Iranda parlamenttik saılaýdyń ekinshi kezeńi bastaldy

<p>ASTANA. KAZINFORM &ndash; Iranda Islam konsýltatıvtik Keńesine parlamenttik saılaýdyń ekinshi týry bastaldy, onyń barysynda búkil el boıynsha 22 okrýgtegi saılaýshylar qalǵan 45 orynǵa depýtattyqqa kandıdattardy saılaıdy.</p>

Saılaý ýchaskeleri juma kúni jergilikti ýaqyt boıynsha tańǵy saǵat 8-de (Astana ýaqyty boıynsha 09:30) ashyldy. Irannyń 15 provıntsııasynda daýys berý ótip jatyr, parlamenttegi 45 orynǵa 90 kandıdat talasyp jatyr. 

Eldiń saılaý komıssııasy daýys berý jergilikti ýaqyt boıynsha saǵat 18:00-ge deıin jalǵasatynyn, eger ishki ister mınıstri qajet dep tapsa, uzartylýy múmkin ekenin habarlady.

Islamdyq keńes (Májilis dep te atalady) – 4 jyl merzimge saılanatyn 290 depýtattan turatyn Iran Islam Respýblıkasynyń bir palataly parlamenti. 

Birinshi týr 2024 jyldyń 1 naýryzynda ótti. Nátıjesinde parlamentke 245 kandıdat keldi. Qalǵan 45 orynnyń taǵdyry búgingi saılaýdyń ekinshi kezeńinde anyqtalady. 

Irannyń 85 mıllıon halqynyń 61 mıllıonnan astamy daýys berý quqyǵyna ıe. Saılaýdyń birinshi kezeńinde saılaýǵa qatysý deńgeıi shamamen 41 paıyzdy nemese 25 mıllıon adamdy qurady. 

Irannyń joǵary kóshbasshysy Álı Hameneı mamyrdyń 10-y kúni tańerteń erte daýys berip, ekinshi týrdyń mańyzdylyǵyna toqtalyp, Iran halqyn saılaýdyń osy kezeńine birinshi týrdaǵydaı qatysýǵa shaqyrdy.