Iranda koronavırýstan kóz jumǵandar sany 70 myńnan asty

TEGERAN. IRNA-QazAqparat - Iranda koronavırýs pandemııasy bastalǵaly beri 70 070 adam indetten kóz jumǵan, dep habarlaıdy QazAqparat IRNA agenttigine silteme jasap.

Bul jaıynda Irannyń densaýlyq saqtaý, emdeý jáne medıtsınalyq bilim mınıstrligi málimet taratty.

Sońǵy táýlikte elde 496 naýqas koronavırýstan kóz jumǵan. Bul - epıdemııa bastalǵan ýaqyttan bergi eń úlken kórsetkish.

Sońǵy málimetke sensek, Iranda indet juqtyrǵandar sany 2 mln 417 230 jetken. Búgingi kúnge deıin onyń ishinde 1 mln 892 229 syrqat dertten jazylǵan. 5244 patsıenttiń jaǵdaıy óte aýyr.

Qazirgi tańda Irandaǵy 301 qala «qyzyl» aımaqta ornalasqan. Al 95 qala - «qyzǵylt sary», 45 qala - «sary» jáne 7 qala «kók» aımaqta tur.

Eldiń densaýlyq saqtaý mınıstrliginiń habarlaýynsha, 652 myń 903 adam KVI vaktsınasynyń alǵashqy dozasyn saldyrǵan. 171 myń 210 ırandyqqa ekpeniń eki dozasy da salyndy.