Iranda koronavırýs juqtyrǵandar sany 6,6 mln asty

NUR-SULTAN. QazAqparat – Iranda pandemııa bastalǵaly 6,6 mln astam adam koronavırýs juqtyrdy. Bul týraly Qazaqstanda koronavırýstyń taralýyna jol bermeý jónindegi vedomstvoaralyq komıssııanyń Telegram-kanalynda aıtyldy, dep habarlaıdy QazAqparat.

Pandemııa bastalǵaly beri Iranda 6,6 mıllıonnan astam adam koronavırýspen aýyrdy. Iran Densaýlyq saqtaý mınıstrliginiń málimetinshe, indetti juqtyryp jatqandardyń kúndelikti ósimi 40 myń adamǵa jaqyndady. Sońǵy táýlik ishinde pandemııa 104 azamattyń ómirin qıdy, osylaısha ólim-jitim sany 132 934-ke jetti.

Sarapshylar mundaı kúrt ósý «omıkron» shtamynyń taralýyna baılanysty ekenin aıtady. Qazirgi ýaqytta 2 615 patsıent ókpeni jasandy jeldetý apparattaryna qosylǵan, qarqyndy terapııa palatalarynda emdelýde. Osyǵan oraı, Iranda jappaı vaktsınatsııa júrip jatyr. 7 aqpandaǵy jaǵdaı boıynsha, 61 170 578 turǵyn COVID-19 vaktsınasynyń alǵashqy dozasyn aldy, 54 561 630 adam tolyq kýrstan ótti. 19 973 438 adam revaktsınalandy.

Anglııanyń shyǵys bóliginde pandemııaǵa baılanysty eldegi eń kóne mekemelerdiń biri jabyldy. Ulybrıtanııadaǵy Ye Olde Fighting Cocks paby COVID-19-ǵa baılanysty bankrotqa ushyrady. «Men óz tobymmen birge pab jumysyn jalǵastyrý úshin bárin jasadym. Alaıda, sońǵy eki jyl meıramhana men qonaq úı bıznesi úshin buryn-sońdy bolmaǵan kezeń boldy jáne biz bul jekpe - jekten utyldyq», - dedi onyń ıesi Krısto Tofallı áleýmettik jelilerde. Pab Ye Olde Fighting Cocks Shyǵys Anglııanyń Sent-Albans qalasynda ornalasqan. 2000 jylǵa deıin ol Gınnestiń rekordtar kitabyna patshalyqtaǵy eń kóne ǵımarat retinde engen.