Iranda bolǵan zilzalanyń qurbandary 100 adamǵa jetti

ASTANA. QazAqparat - Iranda bolǵan jer silkinisiniń qurbandarynyń sany 100 adamǵa jetti. 7,2 magnıtýdalyq jer silkinisi jeksenbi kúni Iran Islam Respýblıkasynnyń shekarasynda boldy. Zilzaladan zardap shekkender sany 1000 adamnan asty, dep jazady TASS agenttigi.

Osy oqıǵaǵa baılanysty qurylǵan daǵdarys ortalyǵynyń málimetterinshe, tabıǵat apatynyń zardabyn ásirese Irannyń batysyndaǵy Kermanshah jáne Ilam provıntsııalary tartqan. Qıraǵan ǵımarattardyń kópshiligi Kasr-e-Shırın, Ilam, Kermanshah sııaqty tap osy óńirdegi qalalarda tirkelgen.

Iran prezıdenti Hasan Roýhanı zardap shekkenderdiń barlyǵyna qajetti kómek kórsetýge tyrysyp jatyr. Jarty aı qoǵamynyń jergilikti ókildigi apat bolǵan aımaqtarda izdeý jáne qutqarý jumystaryn qolǵa aldy. Munda qutqarýshylardyń qosymsha kúshteri jiberildi. Tabıǵat apatynan zardap shekkenderdi azyq-túlikpen, jyly kıimdermen jáne otynmen qamtamasyz etý úshin arnaıy dalalyq gospıtaldar uıymdastyryldy.

Munaı-gaz ınfraqurylymyn qosa alǵanda strategııalyq nysandarǵa zaqym kelmegen. Provıntsııalardaǵy áýejaılar ádettegi rejımde jumys istep jatyr. Aýyr jaraqat alǵandardy Tegeranǵa jóneltý úshin 20 áskerı tikushaq daıyndalǵan.

Úılerin tastap shyqqan jergilikti turǵyndar jerasty dúmpýleri qaıtalanýy múmkin degen úreımen kóshede túnep júr. Sońǵy 3 saǵat kóleminde qýaty 3,6-dan 4,7 magnıtýdaǵa deıin jetetin jerasty dúmpýleri 12 ret qaıtalanǵan.