Iran ıadrolyq nysandarda MAGATE-niń baqylaý kameralaryn qospaıtynyn málimdedi

TEGERAN. QazAqparat – Iran ıadrolyq mámile jańartylǵansha, eldiń ıadrolyq ınfraqurylym nysandarynda ornalasqan Atom energııasy jónindegi halyqaralyq agenttiktiń (MAGATE) beınekameralaryn qosýdy josparlap otyrǵan joq, dep habarlaıdy QazAqparat tilshisi IRNA agenttigine silteme jasap.

«Bul kameralardyń ıadrolyq mámilemen baılanysy bar. Eger Batys osy Paktige oralsa jáne olardyń (kameralardyń – red.) zııan tıgizbeıtinine senimdi bolsaq, biz bul kameralarǵa qatysty sheshim qabyldaımyz.

Irannyń Birlesken keshendi is-qımyl josparyn qabyldaýy aıyptaýdy alyp tastaýǵa jáne senimdi nyǵaıtýǵa negizdelgen. Iran senimdi nyǵaıtý maqsatynda óz qyzmetin shekteýge kelisti. Alaıda olar (ıadrolyq kelisimge qatysýshylar – red.) óz mindettemelerin oryndamady», - dedi Iran Atom energııasy uıymynyń basshysy Muhammad Eslamı.

Maýsym aıynda 35 elden turatyn MAGATE Basqarýshylar keńesi úsh jarııalanbaǵan obektide tabylǵan ýran izderin túsindire almaǵany úshin Irandy synaǵan qarardy basym daýyspen qabyldady, dep habarlaıdy Reuters.

Osy qarardan keıin Iran MAGATE-ge 2015 jylǵy álemdik derjavalarmen kelisimge sáıkes ornatylǵan 27 beınekamerany qosa alǵanda, uıymnyń jabdyqtaryn bólshekteıtinin habarlady.

Iran bıliginiń ustanymyna sáıkes, baqylaý kameralary bul aıyptaýlardy alyp tastaýǵa arnalǵan. Eger aıyptaý áli de óz kúshinde bolsa, kameralardyń jumys isteýine budan bylaı eshqandaı sebep joq.

Iran Atom energııasy jónindegi uıym basshysynyń aıtýynsha, kelisim qalpyna keltirilgenge deıin kameralardy agenttiktiń ózi jınap, mórlep, obektilerde saqtaıdy.

Foto: ru.irna.ir