Iran úsh amerıkalyq sarbazdyń ómirin qıǵan shabýylǵa qatysy joq ekenin málimdedi

<p>ASTANA. KAZINFORM - Iran Iordanııada úsh amerıkalyq áskerı qyzmetker qaza taýyp, ondaǵan adam jaraqat alǵan ushqyshsyz basqarylatyn ushaq shabýylyna qatysy baryn joqqa shyǵardy, dep habarlaıdy <a href="https://en.irna.ir/news/85368668/Tehran-has-nothing-to-do-with-US-base-attack-Iran-s-UN-mission" target="_blank" rel="noopener">IRNA</a> aqparat agenttigi.&nbsp;</p>

Tegerannyń málimdeýinshe, Iordanııa-Sırııa shekarasy mańyndaǵy materıaldyq-tehnıkalyq bazaǵa jasalǵan shabýylǵa onyń eshqandaı qatysy joq.

«Buǵan deıin málim etkenimizdeı, aımaqtaǵy qarsylasý toptary sıonıstik rejımniń balalardy óltirip jatqan soǵys qylmystary men genotsıdine jaýap berýde jáne olar Iran Islam Respýblıkasynyń buıryqtaryna baǵynbaı otyr. Bul toptar óz ustanymdary men basymdyqtaryna, sondaı-aq óz eli men halqynyń múddesine súıene otyryp sheshim qabyldaıdy jáne áreket etedi», - dep málimdedi Iran Syrtqy ister mınıstrliginen.

Buǵan deıin AQSh prezıdenti Djo Baıden men Ulybrıtanııa Syrtqy ister mınıstri Devıd Kemeron Iran qoldaıtyn toptar bir kún buryn Iordanııa men Sırııa shekarasynda ornalasqan AQSh áskerine shabýyl jasady dep aıyptady.

Shabýyldan úsh amerıkalyq sarbaz qaza taýyp, ondaǵan adam jaraqat alǵan.

Amerıkanyń segiz sarbazy kúrdeli medıtsınalyq kómek alý úshin Iordanııadan evakýatsııalandy, biraq olardyń jaǵdaıy turaqty, dep habarlaıdy Reuters.

Baıden Ońtústik Karolınadaǵy saılaýaldy shara kezinde Iordanııada qaza tapqan úsh áskerı qyzmetkerdi bir mınýt únsizdikpen eske alýdy surap, «Biz jaýap beremiz» dep qosty. AQSh qorǵanys mınıstri Lloıd Ostın bul sózderdi qaıtalady.

Irannyń BUU-daǵy mıssııasy jeksenbi kúni keshke Irannyń AQSh bazasyna jasalǵan shabýylǵa onyń esh qatysy joq ekenin málimdedi.

Iran SІM resmı ókili Nasser Kanaanı de Ulybrıtanııanyń Irandy aımaqtaǵy qarsylasý toptarynyń Iordanııadaǵy AQSh bazasyna shabýyl jasaý operatsııasyna qatysqany týraly aıyptaýyn negizsiz dep atady.

Iemendik hýsıtter men Palestınanyń HAMAS toby shabýylǵa qatysty pikirin bildirdi.

«Iordanııanyń soltústik-shyǵysyndaǵy áskerı bazaǵa shabýyl – arab áleminde Amerıka saıasatyna narazylyqtyń aıqyn belgisi», - dep málimdedi Iemenniń Joǵary saıası keńesiniń múshesi Mohammed Álı ál-Hýsı.

Onyń aıtýynsha, AQSh óz bazasyna jasalǵan shabýyldyń mánin túsinýi tıis.

«Amerıkalyq úsh sarbazdyń óltirilýi – bul AQSh basshylyǵyna Gazadaǵy beıkúná jandardy óltirý toqtatylmaıynsha oǵan búkil (musylman) ultqa qarsy turýǵa týra keledi degen belgi», - dep málimdedi óz kezeginde HAMAS saıası bıýrosynyń múshesi Samı Ábý Zýhrı.

Shabýyl úshin jaýapkershilikti Iraktaǵy Iran qoldaıtyn qarýly toptardyń alıansy «Iraktaǵy ıslamdyq qarsylasý» aldy.