Iran ýkraınalyq ushaq apatynan qaza bolǵandardyń otbasyna 150 myń dollardan tóleıdi

TEGERAN. IRNA-QazAqparat – Búgin Irannyń mınıstrler kabıneti 2020 jylǵy qańtarda Tegeran mańynda atyp túsirilgen «Ýkraına halyqaralyq áýe jelileri» ushaq apatynan qaza tapqandardyń árqaısysynyń otbasyna ótemaqy úshin 150 myń dollar nemese onyń eýro túrindegi balamasyn tóleýdi bekitti, dep habarlaıdy QazAqparat IRNA agenttigine silteme jasap.

Irannyń Mınıstrler kabıneti sársenbi kúni Jol jáne qalalyq damý mınıstrligine zardap shekkender otbasyna múmkindiginshe tezirek tıisti agenttiktermen birlese otyryp, ulty, azamattyǵy jáne jynysy boıynsha esh kemsitýsiz jáne qurban bolǵan azamattar elderiniń zańdaryna sáıkes 150 myń AQSh dollaryn nemese soǵan balama somany tóleýdi tapsyrdy.

Eske sala keteıik, bıylǵy 8 qańtarda Tegeran ýaqytymen 6:00-de Imam Homeını atyndaǵy áýejaıdan Tegeran-Kıev baǵytymen ushyp shyqqan «Ýkraına halyqaralyq áýe jelileri» áýe kompanııasynyń Boeing-737 ushaǵy apatqa ushyrady.

Ushaq bortynda 177 adam bolǵan: 168 jolaýshy men 9 ekıpaj múshesi. Onyń ishinde Irannyń – 82, Kanadanyń - 63, Ýkraınanyń - 2 + 9 (ekıpaj), Shvetsııanyń – 10, Aýǵanstannyń – 4, GFR-dyń – 3, Ulybrıtanııanyń 3 azamaty boldy. Onyń barlyǵy qaza tapty.

Ushaq apatyna baılanysty jaýapkershilikti Irannyń áskerı-saıası qurylymy - «Islam revolıýtsııalyq ulandar korpýsy» óz moınyna aldy.

Iran azamattary apat saldarynan qaıtys bolǵan azamattardyń elderimen birneshe otyrys ótkizdi. Kelissóz nátıjesinde taraptar zardap shekkenderdiń otbasyna ótemaqy tóleý týraly kelisti.

Sondaı-aq, Iran múddeli elderge «Ýkraına halyqaralyq áýe jelileri» ushaǵy apatynyń sebepterin zertteý nátıjesi boıynsha tehnıkalyq esep jobasyn tapsyrdy.