Iran Tegeran túbinde ushaq apatynan qaza tapqandardyń múrdesin Ýkraınaǵa berýge daıyn
«Tegeranda júrgen ІІM sarapshylary búgin Ýkraınanyń qaza tapqan barlyq 11 azamaty súıeginen DNK-profıl aldy. Munan ary Ýkraınaǵa berýge daıyndyq júrgizilip jatyr», - dep habarlady Ýkrınform Ýkraına Іshki ister mınıstrligine silteme jasap.
Aldyn ala málimetterge qaraǵanda, qaza tapqan 11 adamnyń múrdesin 2020 jyldyń 19 qańtaryna deıin berý josparlanyp otyr.
Ýkraına Іshki ister mınıstrliginiń 2 sarapshy-genetıgi qaza tapqandardy sáıkestendirý aıaqtalǵanǵa deıin Tegeranda qalady.
Buǵan deıin Ýkraınanyń Ulttyq polıtsııasynyń tergeýshileri el Іshki ister mınıstrligi sarapshylarynyń qatysýymen Tegerandaǵy ushaq apatynan qaza tapqan ýkraındyqtardyń týystarynan DNK úlgisin jınaǵan bolatyn.
Al IRNA agenttiginiń habarlaýynsha, Iran Syrtqy ister mınıstri Mohammad Djavad Zarıf Ýkraına Syrtqy ister mınıstri Vadım Prıstaıkomen telefon arqyly sóılesý barysynda Tegerannyń Kıevke ýkraındyq Boeing-737-800 áýe kemesiniń apatqa ushyraýynan qaza tapqandardyń múrdesin berýge daıyn ekendigin aıtqan. Sonymen qatar ol qara jáshiktegi jazbalardyń mán-jaıyn ashýǵa ýkraınalyq mamandyqtardy tartýǵa daıyn ekendikterin bildirgen.
Eske salaıyq, sársenbi, 8 qańtarda Tegeran ýaqytymen 6:00-de Imam Homeını atyndaǵy áýejaıdan Tegeran-Kıev baǵytymen ushqan «Ýkraına halyqaralyq áýe jelileri» áýe kompanııasynyń Boeing-737 ushaǵy apatqa ushyrady.
Ushaq bortynda 177 adam bolǵan: 168 jolaýshy men 9 ekıpaj múshesi. Onyń ishinde Irannyń – 82, Kanadanyń - 63, Ýkraınanyń - 2 + 9 (ekıpaj), Shvetsııanyń – 10, Aýǵanstannyń – 4, GFR-dyń – 3, Ulybrıtanııanyń 3 azamaty boldy. Olardyń barlyǵy qaza tapty.
«Ýkraınanyń halyqaralyq áýe jelileri» ushaǵynyń apatqa ushyraýyna baılanysty jaýapkershilikti Irannyń áskerı-saıası qurylymy «Islam revolıýtsııalyq ulandar korpýsy» óz moınyna aldy.