Iran Syrtqy ister mınıstrligi Eýropanyń tórt eliniń elshilerin shaqyrdy

<p>ASTANA. KAZINFORM &ndash; Iran Syrtqy ister mınıstrligi beısenbi kúni Reseıge qysqa qashyqtyqtaǵy ballıstıkalyq zymyrandardy jetkizgeni, sondaı-aq bul elderdiń jańa sanktsııalar engizýi týraly aıyptaýdan keıin Ulybrıtanııa, Frantsııa, Germanııa jáne Nıderlandy elshilikteriniń basshylaryn shaqyrdy.</p>

Iran Syrtqy ister mınıstrligi Batys Eýropa isteri departamentiniń bas dırektory Madjıd Nılı Irannyń narazylyǵyn bildirip, tórt batys memleketiniń «destrýktıvti málimdemeleri men áreketterin» qatań aıyptady, dep habarlaıdy IRNA aqparat agenttigi.

- Mundaı qózarastaǵy sharany qalaıda qoldanýǵa degen umtylys Batystyń Iran halqyna qarsy óshpendilik saıasatynyń jalǵasy dep bilemiz jáne oǵan qatysty Iran Islam Respýblıkasy tarapynan tıisti jaýap bolady»,-dedi ol.

Vedomstvo sondaı-aq Ulybrıtanııa, Frantsııa jáne Germanııany Iranǵa qarsy birlesken málimdeme jarııalaǵany úshin aıyptap, ony «dástúrden tys jáne konstrýktıvti emes málimdeme» dep atady. Ol Irannyń ballıstıkalyq zymyrandaryn Reseıge tapsyrdy degen kez kelgen aıyptaýlardyń «múldem negizsiz jáne jalǵan» ekenin atap ótti. Madjıd Nılı Amerıka Qurama Shtattary men onyń keıbir eýropalyq odaqtastary beıbitshilik pen qaýipsizdik týraly sóılesetinin, sonymen birge «olardyń ózderi álemde shıelenistiń kózi bolyp, joıqyn qarýlardy Izraılge satatynyn» atap ótti.

Seısenbi kúni AQSh-tyń Qarjy mınıstrligi Reseıge qysqa qashyqtyqtaǵy ballıstıkalyq zymyrandardy tasymaldaýǵa qatysy bar degen aıyppen 20 ırandyq jeke jáne zańdy tulǵaǵa sanktsııa saldy. Seısenbi kúni jarııalanǵan birlesken málimdemede Ulybrıtanııa, Frantsııa jáne Germanııa berilýi múmkin zymyrandar tasymalyn aıyptap, ony «Iran men Reseıdiń jaǵdaıdy shıelenistirýge umtylýy jáne «eýropalyq qaýipsizdikke tikeleı qater» ekenin aıtty. Olar sondaı-aq Iranǵa qarsy jańa sanktsııalardy, sonyń ishinde Iranmen áýe qatynasy týraly kelisimderdi buzatynyn jarııalady, bul Iran Eırdiń Ulybrıtanııa men Eýropaǵa ushý múmkindigin shekteıdi. Óz kezeginde, sársenbi kúni Nıderlandy Iran elshisin zymyran tasymalyna baılanysty shaqyryp, Tegerannyń kek qaıtarýyna sebep boldy. Brıtanııalyq, frantsııalyq, nemis jáne gollandııalyq dıplomattar Irannyń narazylyǵyn óz astanalaryna jetkizýge ýáde berdi.