Iran ShYU-ǵa qosylý mindettemeleri týraly memorandýmǵa qol qoıdy

TEGERAN. IRNA-QazAqparat – Iran syrtqy ister mınıstri Hosseın Amır Abdollahııan men Shanhaı Yntymaqtastyǵy Uıymynyń bas hatshysy Chjan Mın Samarqanda Irannyń Uıymǵa múshe memleket mártebesin alý baǵytyndaǵy mindettemeleri týraly qujatqa qol qoıdy, dep habarlaıdy QazAqparat menshikti tilshisi IRNA agenttigine silteme jasap.

ShYU bas hatshysy Chjan Mın bul kúnniń Iran úshin de, Uıym úshin de mańyzdy ekenin aıtty.

«Irannyń múshe elder qataryna qosylýy Shanhaı Yntymaqtastyǵy Uıymyn kúsheıte túsedi», - dedi ol.

Iran 2005 jyly ShYU-nyń baqylaýshy memleketi atandy. Eldiń Uıymǵa tolyq múshelikke ótý protsesi 2021 jyly bastaldy. Memorandýmda qaralǵan barlyq mindettemeler oryndalǵannan keıin Iran Islam Respýblıkasy ShYU-nyń tolyq múshesi bolady.

Buǵan deıin habarlaǵanymyzdaı, 14 qyrkúıekte Tashkentte Egıpet Arab Respýblıkasy men Katar memleketine Shanhaı yntymaqtastyǵy uıymy dıalogi boıynsha seriktes mártebesin berý týraly memorandýmdarǵa qol qoıý rásimi ótti.

Aıta ketsek, Shanhaı yntymaqtastyǵy uıymynyń sammıti 15-16 qyrkúıekte Samarqanda ótedi. Sammıtke 15 memlekettiń basshysy jáne ShYU-men resmı baılanys ornatqan onǵa jýyq halyqaralyq jáne óńirlik uıymdardyń, atap aıtqanda BUU, ESKATO, ıÝNESKO, TMD, UQShU, EAEO, AÓSShK jáne EYU men LAG jetekshileri qatysatyny belgili.

Foto: en.irna.ir