Iran men Koreıadan kelgen áskerıler Ulttyq qorǵanys ýnıversıtetiniń magıstratýrasyn aıaqtady
Polkovnık Abdı Hosseın Abadı Djavad (Iran) jáne maıor ıÝn Chjınvýk (Koreıa) «Qarýly kúshter Bas shtaby akademııasy» fakýltetiniń «Áskerı istegi strategııalyq menedjment» mamandyǵy boıynsha bir jyldyq kýrsyn bitirdi. Olarǵa dıplom, tósbelgi jáne estelik syılyqtar tabys etildi.
Ofıtserlerdi Ulttyq qorǵanys ýnıversıteti bastyǵynyń mindetin ýaqytsha atqarýshy, polkovnık Aıdar Berdibekov quttyqtady. Ol armııanyń qanshalyqty qýatty bolsa da, memleket qaýipsizdigin qamtamasyz etýdegi sheshýshi faktor adam jáne joǵary bilikti kadrlar ekenin atap ótti.
«Qazaqstannyń memleketaralyq qatynastaǵy basym baǵyttarynyń biri áskerı-saıası yntymaqtastyq bolyp otyr. Áskerı kadrlardy daıarlaý salasy – elder arasyndaǵy tıimdi ózara is-qımyldy qamtamasyz etýdiń jáne odaqtastyq qatynastardy damytýdyń mańyzdy faktory. Búgin bitirgen ofıtserler – osynyń aıqyn dáleli», - dedi polkovnık Aıdar Berdibekov marapattaý rásiminde.
Óz kezeginde sheteldik magıstranttar Ulttyq qorǵanys ýnıversıtetiniń basshylyǵy men oqytýshylar quramyna alǵys bildirdi.
«Qazaqstannyń aldyńǵy qatarly áskerı bilim ordasynda oqyǵanymdy jáne Koreıadan kelgen birinshi túlek bolǵanymdy maqtan tutamyn. Oqytý qarqyndy jáne nátıjeli boldy. Bul elde men qazaqtyń salt-dástúrimen tanystym. Ásirese, qazaqstandyqtardyń qonaqjaılyǵy men meımandostyǵy unady», - dedi maıor ıÝn Chjınvýk.
Polkovnık Abdı Hosseın Abadı Djavadtyń oqý bitirgen sáti onyń týǵan kúnimen tuspa-tus keldi.
«Búgin men eki ese qýanyshtymyn. Qazaqstandyqtarǵa jomarttyǵy men qonaqjaılyǵy úshin shyn júrekten alǵys aıtamyn. Bizdiń tilimiz birshama uqsas, sondyqtan da maǵan qazaq tilinde sóılesý asa qıyn bolǵan joq. Oqý barysynda orys tilin de úırendim. Ýnıversıtet basshylyǵy men oqytýshylaryna, ásirese áskerı strategııa jáne tıimdilik óner salasyndaǵy bilimderi úshin, alǵys aıtamyn. Endi óz elimde áskerı kafedrada sabaq beremin. Alǵan bilimimdi kýrsanttaryma berýge tyrysamyn», - dedi Iran ókili.