Iran men Izraıl aýmaǵynda neshe qazaqstandyq bar

<p>ASTANA. KAZINFORM &ndash; Syrtqy ister mınıstrliginiń resmı ókili Aıbek Smadııarov Izraıl men Iran aýmaǵynda neshe qazaqstandyq ómir súrip jatqanyn aıtty.</p>

«Izraıl memleketiniń aýmaǵynda konsýldyq esepte turǵan 123 Qazaqstan azamaty bar. Onyń ishinde Qazaqstan elshiligi qyzmetkerleri men januıa músheleri de bar. Biraq keıbir rastalmaǵan derekter boıynsha Izraılde qosymsha 100-ge jýyq Qazaqstan azamaty bolýy múmkin. Olar konsýldyq esepke múldem turmaǵan. Biraq endi bir-birimen neshe túrli chattarda, áleýmettik jeli arqyly aralasyp jatady, sol arqyly bilip jatamyz. Ondaı azamattardyń konsýldyq esepke turýǵa májbúrleı almaımyz», - dedi Aıbek Smadııarov vedomstvonyń baspasóz máslıhatynda.

SІM resmı ókili Izraıl astanasyndaǵy halyqaralyq áýejaı shtattyq rejımde jumys istep turǵandyqtan kelip-ketý shektelmegenin eske saldy.

«Iranda konsýldyq esepte turǵan Qazaqstan azamattarynyń jalpy sany 104 adam. Onyń ishinde Qazaqstan elshiliginiń qyzmetkerleri sondaı-aq olardyń otbasy músheleri bar. Buǵan qosa Iran aýmaǵynda jumys isteıtin qazaqstandyq kompanııalardyń birinde 174 qyzmetker bar. Olar vahtalyq tásilmen jumys istegendikten konsýldyq esepte turmaıdy. Bárimen tikeleı baılanys ornatylǵan, bizdiń baqylaýymyzda», - dedi ol.