Iran men EAEO kelisimi: Qazaqstannyń júzdegen taýaryna eksporttyq jeńildikter jasalady
Aıta ketken jón, atalǵan qujatqa qatysty kelissózder eki jyldan beri júrgizilip keledi. Sonyń nátıjesinde taraptar birqatar taýarlar boıynsha kedendik baj salyǵyn 3 jylǵa deıin tómendetýge ýaǵdalasty. Atap aıtqanda, Iran 246 taýarǵa, al Eýrazııalyq ekonomıkalyq odaq elderi 175 taýarǵa tarıf jaǵynan jeńildik jasaıtyn bolady.
Máselen, Qazaqstannyń 102 eksporttyq taýary boıynsha Iranda kedendik baj salyǵy tómendeıdi. Sonyń ishinde sıyr eti, qoı eti, sary maı, noqat, burshaq, jasymyq, arpa, kúrish, ósimdik maılary, makarondar, kondıterlik ónimder, bolat prokaty, relster, akkýmýlıatorlar jáne taǵy basqa ónimder bar. Óz kezeginde Iran memleketi EAEO-ǵa piste, qurma, injir, meıiz, asshaıan, apelsın, lımon, laım, kondıterlik ónimder, shyryndardyń keıbir túrleri, qurylys boıaýlary, laktar, ydys, jýý quraldary, kilemder, plastmassa buıymdary sııaqty taýarlardy 10 protsentke deıingi jeńildikpen tasymaldaı alady. Al alma, qııar, tomattar sııaqty ırandyq ónimderge tek maýsymdyq, naqty aıtqanda, qarasha men naýryz aralyǵynda ǵana jeńildikter beriledi.Búgingi kelisimge Qazaqstan tarapynan QR Premer-Mınıstriniń birinshi orynbasary Asqar Mamın qol qoıdy.
«Biz Irannyń taýarlaryn jetkizýge qajetti logıstıkany usynýǵa daıynbyz. Qazir Qazaqstan, Túrikmenstan men Irandy baılanystyratyn temirjol jelisi bar. Búginde biz Túrikmenstan men Irannyń shekarasyndaǵy logıstıkaǵa óz kapıtalymyzdy salýdy qarastyryp jatyrmyz. Sondyqtan taýarlardy jetkizý jaǵynan Qazaqstan barlyq jaǵdaılardy jasaıtyn bolady», - dep atap kórsetti A.Mamın.
Al Armenııanyń vıtse-premeri Tıgran Avınıannyń aıtýynsha, endigi kezekte EAEO men Iran arasyndaǵy kelisimdi árbir memlekettiń zań shyǵarýshy organdary tezdetip bekitýi kerek.
«Erkin ekonomıkalyq aımaqtyń arqasynda shyǵyndardy azaıtyp qana qoımaı, ózara tıimdi óndiristerdi de ashýǵa bolady. Máselen, Irannyń kásipkerleri óz shıkizatyn ákelip, jańa ónimdi shyǵara alady. Olar úshin Eýrazııalyq ekonomıkalyq odaqqa bıýrokratııalyq kedergisiz kirýge múmkindik jasalyp otyr. Negizi, dál osy bastama Úndi muxıty - Parsy shyǵanaǵy - Qara teńiz xalyqaralyq tranzıtiniń ashylýyna jol ashady. Menińshe, Vetnammen aradaǵy yntymaqtastyq ta kúsheıe túsedi. Aldaǵy ýaqytta Úndistan jáne basqa da memlekettermen kelisimder jasalýy ábden múmkin», - dep atap kórsetti T.Avınıan.