Iran men Aýǵanstannan Qazaqstanǵa esirtki ákeletin qylmys arnasy joıyldy
Esirtkige qarsy 47, onyń ishinde Reseı, Qyrǵyzstan jáne Avstralııanyń quzyretti organdarymen birlesken operatsııalar júrgizildi.
Esirtki tasymalynyń 8 halyqaralyq jáne 14 óńirlik arnalary joıyldy.
Atap aıtqanda, Aýǵanstannan Qazaqstanǵa kontrabandalyq jolmen 5 kg geroın jáne 48 kg metamfetamın jetkizgen sheteldik azamat ustaldy.
Aýǵan opıattaryn esirtki trafıgin qalyptastyrý elderinen Qazaqstanǵa kontrabandalyq jolmen tasymaldaýǵa qatysy bar esirtki toby áreketiniń joly kesildi.
1 kg geroın, 2 kg apıyn jáne 14 kg gashısh tárkilendi.
Kaspıı sý aıdyny arqyly Irannan Qazaqstanǵa opıat jetkizýdiń turaqty arnasy joıyldy.
Jyldam qaıyqtardy paıdalanyp, kontrabandalyq jolmen 30 kg apıyn jáne 100 metadon tabletkalaryn jetkizgen tórt sheteldik ustaldy.
Jyldyń birinshi toqsanynyń ózinde 8 aýqymdy esirtki zerthanasy joıyldy. Zańsyz aınalymnan 73 kg «mefedron» jáne 223 kg «α-PVP» psıhotroptyq zaty alyndy.
Eger buryn sıntetıka óndirisi Almaty jáne soltústik oblystarǵa tán bolsa, búginde olardyń ornalasýy birtindep basqa aımaqtarǵa tarap jatyr.
Mysaly, Túrkistan oblysynda kórshi elderdiń esirtki naryǵyna jetkizýge arnalǵan psıhotroptyq zattardyń sheteldikter uıymdastyrǵan aýqymdy óndirisiniń áreketi toqtatyldy.
Sondaı-aq, Shymkent qalasy men Jambyl oblysynda óz ónimderimen ishki esirtki naryǵyn qamtamasyz etip kelgen iri esirtki zerthanalary tabyldy.
Atalmysh «dızaınerlik esirtkilerdi» óndirý alańdarynyń ornalasýy men satylýy boıynsha elimizdiń megapolısteri áli kúnge deıin aldyńǵy qatarda ekenin aıtyp ótý kerek.
Jyl basynan beri esirtki qurylymdarynyń 67 qatysýshysy ustaldy.
Zańsyz aınalymnan 483,2 kg psıhotroptyq zattar, 11 kg geroın, 32,8 kg apıyn, 63,7 kg gashısh, 41,6 kg marıhýana jáne 17 tonnadan astam kóknár shıkizaty, sondaı-aq 22 tonnadan astam hımııalyq reagentter alyndy.
UQK esirtki bıznesine qarsy is-qımyl boıynsha is-sharalardy kúsheıtilgen rejımde jalǵastyryp jatyr.