Iran men Aýǵanstan shekarasynda 10 shaqyrymdyq qabyrǵa turǵyzyldy

<p>ASTANA. KAZINFORM — Iran áskeri eldi mıgranttar aǵynynan qorǵaý úshin Aýǵanstanmen shekarada 10 shaqyrymnan asatyn qabyrǵa turǵyzdy. Bul týraly <a href="https://english.alarabiya.net/News/middle-east/2024/09/23/iran-walls-off-part-of-border-with-afghanistan-media" target="_blank" rel="noopener">Al Arabiya</a> habarlady. </p>

Basylymnyń málimetinshe, Iran men Aýǵanstannyń ortaq shekarasy 900 shaqyrymnan asady jáne bosqyndar únemi ol jerden ótedi. Aýǵanstandyq mıgranttar aǵyny 2021 jyldyń tamyzynda Talıban Aýǵanstan úkimetin basyp alǵannan keıin artty.

— Shekara qabyrǵasynyń 10 shaqyrymnan astamy salyndy, taǵy 50 shaqyrymyn aıaqtaý qajet, — dedi Irannyń qurlyqtaǵy kúshteri qolbasshysynyń orynbasary general Nozar Nematı.

Aýǵandyq mıgranttar sany týraly resmı málimet jarııa etilmegen, biraq parlament múshesi Abolfazl Torabı olardyń sany 6 mıllıonnan 7 mıllıonǵa deıin jetetinin habarlady. 

Jaqynda úkimet zańsyz bosqyndarǵa qarsy kúresti kúsheıtip, olardyń shyǵys shekaradan júıeli túrde shyǵarylatynyn habarlady.

— Shekarany jabý arqyly biz elge kirý-shyǵýdy baqylaýǵa alyp, shekaralas aımaqtardaǵy qaýipsizdikti kúsheıtkimiz keledi, — dedi Nematı.

Qyrkúıekte Irannyń ishki ister mınıstri Eskandar Momenı Iran shekarany jabý úshin qabyrǵaǵa qosymsha tikenek symdar men sý toltyrylǵan aryqtardy qoldanatynyn málimdegen bolatyn.

Sondaı-aq, qyrkúıektiń 13-i kúni Parlament Ulttyq qaýipsizdik komıtetiniń baspasóz hatshysy Ibragım Rezaı polıtsııanyń jaqyn arada eki mıllıonnan astam zańsyz azamatty elden shyǵarýdy josparlap otyrǵanyn aıtty.

Málimetterge qaraǵanda, bıylǵy jyldyń naýryz aıynan beri Iran 2,7 mıllıonnan astam aýǵan bosqynyn qabyldaǵan.

Bul — eldegi zańdy mıgranttardyń 97 paıyzy.