Iran Qazaqstanmen EAEO aıasyndaǵy yntymaqtastyqqa joǵary mán beredi - Mohammad Djavad Zarıf
«Elderimiz arasyndaǵy mádenı, tarıhı, saıası, ekonomıkalyq baılanystar óte jaqsy ári mańyzdy. Qazaqstannyń Syrtqy ister mınıstrimen eki el baılanystarynyń kókjıegine sholý jasap, mańyzdy ekijaqty, aımaqtyq jáne halyqaralyq máselelerdi talqyǵa saldyq. Biz Qazaqstannyń halyqaralyq arenada Iranǵa jáne onyń ıadrolyq baǵdarlamasyna qoldaý kórsetip otyrǵany úshin úlken rızashylyǵymyzdy bildiremiz. QR Tuńǵysh Prezıdenti Nursultan Nazarbaevtyń kóptegen bastamasyn, ıadrolyq qarýsyz aımaq qurý bastamasyn qoldaımyz», - dedi Iran Syrtqy ister mınıstri QR Premer-Mınıstriniń orynbasary – Syrtqy ister mınıstri Muhtar Tileýberdimen kezdesýden keıin BAQ ókilderine arnalǵan málimdemesinde.
Sonymen qatar ol qazaqstandyq áriptesimen Aýǵanstan daǵdarysyn, sol elde turyp jatqan ulttar men ulystardyń teńdigin qamtamasyz etý máselelerin talqyǵa salǵanyn aıtty.
«Eýrazııalyq ekonomıkalyq odaq aıasyndaǵy áriptestigimiz óte mańyzdy. Sonymen qatar Kaspıı teńizin Iran men Qazaqstannyń jáne basqa da Kaspıı mańy elderiniń beıbit maqsatta paıdalanýy qajettigin atap óttik. Kaspıı mańy elderi baılanystaryn kúsheıtý máselesine nazar aýdardyq. Qazaqstannyń Bander-Abbas portynda kóbirek bolý múmkindigin qoldap, oǵan jaǵdaı jasap otyrmyz», - dedi ol.