Iran Qazaqstandaǵy týrıstik aǵymdy ulǵaıtýǵa kómektesýge daıyn
QR Týrızm jáne sport mınıstri Erbol Myrzabosynov elordada Iran Islam Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Álı Akbar Djoýkar myrzamen kezdesti. Kezdesý barysynda taraptar týrızm jáne sport salasyndaǵy ekijaqty yntymaqtastyqtyń negizgi máselelerin talqylady.
Mınıstr eki el arasyndaǵy kóp ǵasyrlyq tarıhı baılanystarǵa toqtalyp, Iran sportshylary el astanasynda uıymdastyrylǵan 5-shi Dúnıejúzilik kóshpendiler oıyndarynda sátti óner kórsetkenin atap ótti. Erbol Myrzabosynov birlesken jobalardy júzege asyrý úshin yntymaqtastyqtyń mańyzyna senim bildirdi.
«Irannyń saıahatshylaryn, týrıstik qaýymdastyq ókilderin elimizdiń baı mádenı jáne tarıhı murasymen tanysýǵa jáne týrıstik kórmelerge qatysýǵa shaqyramyz. Sondaı-aq Qazaqstan sport salasyndaǵy baılanystardy damytýǵa erekshe mán beredi. Irandyq sportshylardy elimizde ótetin jarystarda kórýge qýanyshtymyz. Atalǵan baǵyttar boıynsha yntymaqtastyqty nyǵaıtýǵa daıynbyz», — dedi Erbol Myrzabosynov.
Óz kezeginde, Álı Akbar Djoýkar Qazaqstan men Iran arasyndaǵy qarym-qatynastardy odan ári damytý úshin úlken áleýet bar ekenin aıtyp, Irannyń Túrkııa, Ózbekstan jáne Tájikstanmen yntymaqtastyqtyń tabysty tájirıbesine súıene otyryp, Qazaqstandaǵy týrıstik aǵymdy ulǵaıtýǵa kómektesýge daıyn ekenin jetkizdi.
Sonymen qatar elshi myrza medıtsınalyq týrızmdi qosa alǵanda, jańa týrıstik baǵyttardy damytýǵa qyzyǵýshylyq tanytty.
Eske salsaq, Erbol Myrzabosynov sańlaq sportshylar Bekzat Sattarhanov pen Denıs Tenniń analarymen kezdeskeni habarlandy.