Iran ınvestorlary Aqtaýda farmatsevtıka fabrıkasyn salýǵa nıetti

AQTAÝ. QazAqparat - Búgin Mańǵystaý oblysynyń ákimi Nurlan Noǵaev ırandyq «NIAK» kompanııasynyń delegatsııasyn qabyldady, dep habarlaıdy QazAqparat oblys ákiminiń baspasóz qyzmetine silteme jasap.

Eki jaqty kezdesýde «NIAK» kompanııasynyń quryltaıshysy Hıýman Baıat Aqtaýdaǵy arnaıy ekonomıkalyq aımaǵynda farmatsevtıka fabrıkasy jobasyn júzege asyrýǵa daıyn ekendigin jetkizdi.

Investorlar tórt kezeńnen turatyn jobaǵa 40 mln AQSh dollary kóleminde qarjy quımaq. Alǵashqy kezeńin bıyl jyl sońyna deıin iske qosýdy kózdep otyr. Qazir «Aqtaý teńiz porty» arnaıy ekonomıkalyq aımaǵymen kelisimshart jasasyp, kásiporynnyń qurylysy úshin jer telimi berildi. Sonymen qatar daıyn ǵımarat berý de josparlanyp otyr.

Kásiporynda aıyna 2 mln quty dezınfektsııa qural shyǵarylmaq. Atap aıtqanda antıseptık, ıod, dáke men betperde óndiriledi. Joba tolyq iske qosylǵan soń 100 adam turaqty jumyspen qamtylady.

Nurlan Noǵaev jergilikti atqarýshy organdar óńirdiń áleýmettik-ekonomıkalyq damýyna oń serpin beretin jáne jańa jumys oryndaryn quratyn mundaı bastamalardy qoldaýǵa daıyn ekendigin jetkizdi.