Irakta ereýilshiler Prezıdent saraıyna basyp kirdi

NUR-SULTAN. QazAqparat – Sheıit ımam Mýktada as-Sadr Iraktyń eń yqpaldy saıasatkerleriniń biri. Onyń elde mıllıondaǵan qoldaýshylary bar. Imam saıasattan ketetinin málimdegennen keıin onyń júzdegen qoldaýshylary Baǵdattyń sheteldik mıssııa ókilderi otyratyn «Jasyl dálizine», artynan Prezıdent saraıyna basyp kirdi, dep habarlaıdy QazAqparat BBC agenttigine silteme jasap.

Kúshtik qurylymdar atys qarýy men kózden jas shyǵaratyn gaz qoldandy, qalaǵa ásker kirgizilip, komendanttyq saǵat engizildi.

Qaqtyǵystyń saldarynan keminde 15 adam ólip, 200-den astamy jaraqat aldy.

Túrkııalyq Anadoly agenttiginiń habarlaýynsha, Sadrdyń jaqtaýshylary úkimettiń otstavkaǵa ketýin talap etip jatyr. Osydan eki kún buryn Sadr AQSh elge basyp kirgen 2013 jyldan keıin saıasatqa aralasqandardyń barlyǵynyń (Sadrdyń óziniń blogyn qosa alǵanda) laýazymdarynan ketýin talap etti.

Iraktyń INA agenttiginiń habarlaýynsha, tártipsizdikter bastalǵannan keıin Mýktada as-Sadr kúsh kórsetý áreketteri toqtaǵanǵa deıin ashtyq jarııalady. Alaıda ımamnyń keńsesi muny rastamady.

Iraktyń Premer-Mınıstri Mýstafa al-Kazymı Birikken jedel áskerı qolbasshylyq ókilderimen kezekten tys keńes ótkizip, ereýilshilerdiń ólimi boıynsha tergeý júrgizýdi tapsyrdy. Óıtkeni qarýlanǵan sarbazdarǵa kópshilikke oq atýǵa tyıym salynǵan edi.

Kýveıttiń Iraktaǵy elshiligi óz azamattaryn elden ketýge, al Irakqa endi barǵaly jatqan azamattarǵa bir-birimen básekeles sheıttik toptardyń tártipsizdikterine baılanysty sapardy keıinge shegere turýǵa shaqyrdy.

Osyǵan deıin, ıaǵnı dúısenbi kúni Baǵdat kóshelerinde sadrıster «Úılestirý qurylymy» degen ataýmen belgili ırandyqtarǵa jaqyn sheıit toptarymen atysqan bolatyn.

Irakty qoldaý jónindegi BUU mıssııasy (UNAMI) bolǵan jaǵdaıdy óte qaýipti shıelenis dep atap, barlyq taraptardy jaǵdaıdyń baqylaýdan shyǵýyna aparatyn áreketterden aýlaq bolýǵa shaqyrdy.

«Qazir Iraktyń memleket retindegi ómirine qaýip tónip tur», dep eskertti mıssııa ókilderi.

AQSh ókilderi sonymen qatar Baǵdattaǵy tártipsizdikter týraly habarlarǵa qaramastan halyqty tynyshtyqqa shaqyrdy.

Foto: www.bbc.com