Irak depýtattary elden sheteldik áskerılerdi shyǵarý týraly rezolıýtsııa qabyldady

BRıÝSSELЬ. QazAqparat – Irak depýtattary úkimetti AQSh jáne basqa da sheteldik áskerlerdi el aýmaǵynan shyǵarý úshin sheshim qabyldaýǵa shaqyrdy, dep habarlaıdy QazAqparat tilshisi.

«Irak úkimeti kez kelgen sheteldik áskerlerdiń Irak jerin, áýe jáne sý joldaryn paıdalanýyna tyıym engizýge kúsh salýy kerek», - delingen jeksenbi kúni qabyldanǵan qujatta.

Parlamenttik rezolıýtsııa úkimet úshin zań sııaqty mindetti bolyp sanalmaıdy. Alaıda buǵan deıin Irak premer-mınıstri Adel Abdýl Mahdı depýtattardy sheteldik áskerılerdiń qatysýymen jasalatyn áreketterdi meıilinshe jyldamdatyp aıaqtaýǵa shaqyrǵan edi.

Parlamentte daýys berý AQSh-tyń áýe soqqysy jasalǵannan keıin boldy.

Eske salsaq, 3 qańtarda Baǵdat halyqaralyq áýejaıyna jasalǵan raketa shabýylynan 8 adam kóz jumdy. Raketalar «Al-Hashd ash-Shaabı» shııt jasaǵyna qarsy baǵyttalǵan bolatyn. Keıinnen bul amerıkalyq Pentagonnyń operatsııasy ekeni belgili boldy.

Aıta keteıik, raketa shabýylynan qaza tapqandar arasynda ırandyq Islam revolıýtsııasy áskerleri korpýsynyń arnaıy maqsattaǵy «Al Kýds» qarýly kúshteriniń qolbasshysy Kasem Súleımanı de bar.

Al, AQSh Prezıdenti Tramp Irannyń mańyzdy nysandaryn atqylaý múmkindigin joqqa shyǵarmady.