Irak BUU-ǵa Izraıl Iranǵa shabýyl jasaý úshin onyń áýe keńistigin paıdalandy dep shaǵymdandy

<p>ASTANA. KAZINFORM &ndash; Irak Respýblıkasy BUU Bas hatshysy Antonıý Gýterrısh pen búkilálemdik uıymnyń Qaýipsizdik keńesine Izraıldiń Iranǵa soqqy berý úshin Iraktyń áýe keńistigin paıdalanýyna baılanysty narazylyǵyn bildirdi, dep habarlaıdy <a href="https://tass.ru/mezhdunarodnaya-panorama/22247141" target="_blank" rel="noopener">TASS</a> aqparat agenttigi.</p>

«Irak 26 qazanda Izraıldiń Irak áýe shekaralaryn óreskel buzǵany jáne Iranǵa soqqy berý úshin eldiń áýe keńistigin paıdalanǵanyna baılanysty Bas hatshy men BUU Qaýipsizdik keńesine resmı túrde narazylyq notasyn jiberdi», - delingen Irak mınıstrler kabınetiniń basshysy Muhammed as-Sýdanı keńsesi Telegram arnasynda jarııalanǵan qujatta.

Premer sondaı-aq Syrtqy ister mınıstrligine «Irak egemendiginiń buzylýyn talqylaý úshin AQSh-pen baılanysýdy» tapsyrdy.

Irak úkimeti «eldiń áýe keńistigin basqa memleketterge, ásirese syılastyq qarym-qatynasta otyrǵan kórshiles memleketterge shabýyl jasaý úshin paıdalanýǵa jol bermeıtinin» rastady.

Baǵdad «ártúrli deńgeıde Iraktyń egemendigin buzýmen kúresýge» ýáde berip, barlyq taraptardy daýlardy «dıalog arqyly» sheshýge shaqyrdy.

26 qazanda Izraıl qorǵanys kúshteri «kóptegen úzdiksiz shabýyldarǵa» jaýap retinde Irandaǵy áskerı nysandarǵa soqqy beretinin jarııalady. Irannyń áýe qorǵanys kúshteri málimdemesinde shabýyl Ilam, Tegeran jáne Hýzestan provıntsııalaryndaǵy áskerı nysandarǵa jasalǵany, biraq keltirilgen shyǵyn shekteýli ekeni aıtylǵan.

Bul soqqy HAMAS, «Hezbolla» jáne Islam revolıýtsııasy Saqshylar korpýsy (Iran Qarýly kúshteriniń elıtalyq bólimsheleri) jetekshiligindegi negizgi tulǵalardyń óltirilýine jaýap retinde ırandyq áskerıler evreı memleketine jappaı zymyrandyq shabýyl jasaǵan 1 qazandaǵy oqıǵalarǵa jaýap boldy.

Osyǵan deıin BUU Qaýipsizdik Keńesiniń dúısenbide Izraıldiń Iranǵa soqqy berýine baılanysty bas qosatynyn habarladyq.