IQanat olımpıadasynyń fınalyna Batys Qazaqstannan 30 daryndy bala qatysyp jatyr
BQO bilim basqarmasynyń baspasóz qyzmetinen málim etkenindeı, elimizdiń 166 aýdanynda 8-synypta oqıtyn 37 myń balanyń arasynan irikteýden ótip, ekinshi týrda úzdik atanǵan 953 bala Nazarbaev ýnıversıtetinde ótetin «IQanat-2023» respýblıkalyq olımpıadasynda baq synaıdy. Olardyń 30-y – Batys Qazaqstan oblysynyń ókilderi.
Bul joba – Memleket basshysy Q.K.Toqaevtyń iri bıznes ókilderine qoǵamdy tolǵandyratyn áleýmettik máselelerdi sheshýden shet qalmaýǵa jasaǵan úndeýiniń kórinisi. Aýyl oqýshylarynyń bilim deńgeıin kóterý – elimizdegi eń mańyzdy máselelerdiń biri.
Osy maqsatta aýyl oqýshylary arasyndaǵy eń aýqymdy oflaın olımpıadany «IQanat» qoǵamdyq qory uıymdastyryp keledi.
Sońǵy bes jylda aýyl mektepteriniń 160 myńnan astam oqýshysy sapaly bilim alýǵa múmkindik aldy. Respýblıkalyq slet aıasynda sońǵy irikteý kezeńi ótip, 120 jeńimpaz IQanat mektebine tegin oqýǵa shaqyrý alady, al qalǵan qatysýshylar olımpıadadan keıingi bilim berý baǵdarlamalarymen qamtylatyn bolady.
IQanat olımpıadasy jáne qordyń basqa da baǵdarlamalary myńdaǵan aýyl balalaryna eń joǵary tehnologııamen qamtamasyz etilgen bilim ordalarynyń biri – IQanat High School of Burabay mektebine túsip, oqýǵa múmkindik beredi. Aýyl balalary myqty muǵalimdermen qarym-qatynas jasaý arqyly baǵa jetpes tájirıbe alyp, tanysý aıasy men bilim kókjıegin keńeıtedi. Túptep kelgende, olardyń úzdik joǵary oqý oryndarynda bilim alýyna jol ashady. Qor baǵdarlamalarynyń túlekteri – aýyl mektepteriniń oqýshylary Nazarbayev University, University of Purdue, Polytechnic University of Hong Kong, University of Chicago jáne basqa ýnıversıtetterge túsýde.
IQanat áleýmettik jobasyn júzege asyrý qordyń 100-den astam qamqorshylary úlesiniń arqasynda múmkin boldy. Qamqorshylar – aýyl oqýshylaryna kómektesip, balalardyń sapaly bilim alýyna jaǵdaı jasaý nıetimen birikken qazaqstandyq kásipkerler.
«Meniń atym – Ibrahım Jaılan, Qajym Jumalıev atyndaǵy Qaratóbe mektep gımnazııasynyń oqýshysymyn. Iqanat mektebi týraly buryn da estigenmin. Birinshi kezeń ótpesten buryn Iqanat-tyń oblystaǵy ókilderi jáne buryn bizdiń mektepte oqyǵan atalmysh bilim ordasy túlekterinen tolyǵyraq málimet aldym. Olar mektebimizge kelip, tanystyrylym jasaǵan bolatyn. Iqanat respýblıkalyq mektep ekenin jáne onyń olımpıadasy aýyl balalary úshin úlken múmkindik beretinin bilip, qýandym. Ekinshi kezeńge jaqsylap daıyndaldym, sonyń arqasynda respýblıkalyq fınalǵa joldama aldym. Endi úshinshi kezeńnen de sátti ótsem deımin. Osyǵan oraı ózime bilim bergen ustazdaryman alǵys aıtqym keledi», dedi BQO-dan kelgenderdiń biri Ibrahım Jaılan.
Aıta keteıik, Iqanat respýblıkalyq olımpıadasynyń úshinshi týry 20 maýsymda ótedi.