Ipoteka beretin bankter ózderin ǵana oılaıdy - Záýresh Baımoldına

ASTANA. QazAqparat - QR Ádilet mınıstrligi erikti saqtandyrý júıesin damytý joldaryn qarastyryp jatyr. Búginde ıpotekalyk nesıeler naryǵynda saqtandyrý júıesi bar bolsa da, kóp jaǵdaıda, ondaı júıe birjaqty, ıaǵnı úleskerler úshin emes, bankter úshin tıimdi, dep xabarlaıdy QazAqparat tilshisi.

"Ipotekalyq zaım týraly kelisimshart jasalǵanda barlyǵy bankterge, tipti saqtandyrý tólemderi de solarǵa beriledi. Sonda ol erikti túrde emes, mindetti shara bolyp sanalady. Amal joq, nesıe alǵannan keıin adam kelisýge májbúr. Máselen, "Besobany" (Qaraǵandyda qulap qalǵan úı - avt.) alaıyqshy, sol kezde barlyq saqtandyrý tólemderin bank aldy. Al xalyqqa bıýdjettiń esebinen ótemaqy berildi. Bunyń ózi ıpotekalyq nesıelendirý naryǵyndaǵy saqtandyrý júıesiniń durys jolǵa qoıylmaǵanyn kórsetse kerek", - dedi QR Ádilet vıtse-mınıstri Záýresh Baımoldına zań-jobalaý qyzmeti boıynsha vedomstvoaralyq komıssııanyń búgingi otyrysynda.

Onyń aıtýynsha, elimizde erikti saqtandyrý júıesin damytqan mańyzdy. Sonda ǵana xalyqtyń menshik quqyǵy qorǵalady. Alaıda adamnyń menshik quqyǵyn tolyǵymen qorǵaý úshin jyljymaıtyn múliktiń kimge, qalaı jáne qashan satylǵany týraly tolyq aqparat bolýy shart. Aqparattyq júıelerdi ıntegratsııalap, bir-birine qosý qajet. "Onsyz xalyqty erikti saqtandyrý júıesine úndeý erte. Bul - naqty zertteýdiń nátıjesi", - dep atap kórsetti vıtse-mınıstr.