IPO: QazMunaıGazdyń dıvıdend tóleý múmkindikteri baǵalandy
«Byltyr dıvıdend tóleýge 200 mlrd teńge bólindi, bir aktsııaǵa shaqqandaǵy tólem 327 teńgeni qurady. IPO-ǵa shyqqannan keıin, «QazMunaıGaz» 3 jyl ishinde keminde 200-250 mıllıard teńge somasynda jyl saıynǵy dıvıdend baǵyttaýdy josparlap otyr. Bul turǵyda Brent markaly munaıdyń ortasha jyldyq baǵasy barreline keminde 70 dollar bolýy tıis», - dedi «QazMunaıGaz» kompanııasy qarjy departamentiniń jetekshi mamany Maqsat Baızatov elordada atalǵan kompanııany IPO-ǵa shyǵarýǵa arnalǵan jıynda.
Onyń aıtýynsha, kompanııanyń dıvıdendtik saıasaty aktsıonerlerdiń, kredıtorlardyń jáne kompanııanyń óziniń múddelerin teńgerimdeýge, sondaı-aq onyń aktsıonerlerine dıvıdendter tóleý mólsherin anyqtaýdyń ashyqtyǵyna baǵyttalǵan. Sondyqtan bir aktsııaǵa dıvıdendter kompanııanyń qarjylyq jaǵdaıyna qaraı tólenedi.
Atap aıtqanda, «QazMunaıGaz» IPO-syna qatysý arqyly adamdar munaı óndirý, tasymaldaý, qaıta óńdeý sııaqty qyzmetter usynatyn iri kompanııanyń úleskerine aınala alady. Bolashaq aktsıonerler kompanııa tabysynan dıvıdend retinde paıda kórý quqyǵyna ıe bolady.
«QazMunaıGaz» kompanııasynyń jalpy aktıvteri 32 mlrd dollardy qurap otyr. Dıvıdendter tóleý múmkindigi munaı baǵasyna baılanysty bolady.
Budan buryn habarlanǵandaı, 7 qarashada «Samuryq-Qazyna» qory «QazMunaıGaz» kompanııasynyń ózine tıesili úlesiniń 5 paıyzyn IPO-ǵa shyǵaratynyn resmı jarııalady.
Bul jolǵy ІRO aıasynda «QazMunaıGaz» kompanııasynyń «Samuryq-Qazynaǵa» tıesili 30,5 mln aktsııasy satylady.
Bir aktsııanyń quny 8406 teńge dep belgilengen. ІRO kelesi aıǵa deıin josparlanǵan. Naqtyraq aıtsaq, ınstıtýtsıonaldyq ınvestorlardan (zańdy tulǵalar) ótinim qabyldaý 9 qarashada bastalyp, 30 qarashada aıaqtalady. Al bólshek ınvestorlardan (jeke tulǵalar) ótinim qabyldaý 9 qarashada bastalyp, 2 jeltoqsanda saǵat 15.00-de aıaqtalady. «Samuryq- Qazyna» qory búkil ótinimderdi jınap, maquldaǵannan keıin satylǵan aktsııalar jeltoqsannyń birinshi onkúndiginde ınvestordyń shotyna túsedi.